Umuhanzikazi Butera Jeanne D’Arc , uzwi nka Knowless muri muzika nyarwanda, yamaze kwemeranywa n’abategura igitaramo cy’umunsi w’amahoro ko ku nshuro ye ya kabiri azaririmba mu gitaramo cy’uyu mwaka, igitaramo azahuriramo n’ibyamamare birimo Ali Kiba na Fally Ipupa, i Kampala muri Uganda.
Buri mwaka tariki 21 Nzeri, hizihizwa umunsi mpuzamahanga w’amahoro, ibi bikaba byaraturutse ku gitekerezo cy’umukinnyi w’amafilime w’umwongereza witwa Jeremy Gilley washinze umuryango udaharanira inyungu yise “Peace One Day”, hari mu mwaka w’1999. Kuva ubwo, buri mwaka haba igikorwa cyo kwizihiza umunsi mpuzamahanga w’amahoro, ahatangirwa ubutumwa bwo kwimakaza ubumwe n’amahoro mu batuye isi bose.
Umwongereza Jeremy Gilley aha yari i Kigali muri Nzeri umwaka ushize
Ubwo uyu munsi wizihizwaga umwaka ushize, igitaramo cyo kuwizihiza cyabereye mu Rwanda kuri Petit Stade Amahoro i Remera mu mujyi wa Kigali, ahari hatumiwe abahanzi b’ibyamamare muri Afrika barimo Aki Kiba wo muri Tanzania, Ice Prince wo muri Nigeria, Innos B wo muri Repubulika Iharanira Demokarasi ya Kongo ndetse n’abahanzi nyarwanda barimo itsinda rya Urban Boys na Butera Knowless.
Knowless agiye yagiriwe icyizere ubugira kabiri ngo asusurutse abakunzi ba muzika ariko anatange ubutumwa bw'amahoro
Kuri uyu wa Gatatu tariki 20 Mata 2016, nibwo umwongereza Jeremy Gilley uri mu Rwanda yabonanye na Butera Knowless bagirana ibiganiro, bemeranywa ko tariki 21 Nzeri 2016, uyu muhanzikazi azaririmbana n’abandi bahanzi b’ibyamamare mu gitaramo cya “Peace One Day” kizabera i Kampala ahitwa Lugogo Cricket Oval, aho azaba ari kumwe n’abahanzi bo muri Uganda nka Maurice Kirya na Cindy Sanyu, hanyuma hakazaba hari Ali Kiba wo muri Tanzania, Ice Prince wo muri Nigeria ndetse n’icyamamare Fally Ipupa wo muri Repubulika Iharanira Demokarasi ya Kongo.
Butera Knowless na Jeremy Gilley, nyuma y'ibiganiro bagiranye mu mujyi wa Kigali
Butera Knowless yabwiye umunyamakuru wa Inyarwanda.com ko kongera kumuhitamo byatewe no kuba barishimiye uburyo yitwaye mu gitaramo cy’umwaka ushize, hakiyongeraho kuba abakunzi ba muzika bo muri Uganda baragaragarije abategura iki gitaramo ko ari we muhanzi wo mu Rwanda bifuza, bityo nawe akaba yiteguye kuzakora ibishoboka byose ngo azashimishe abazitabira icyo gitaramo.
Umwaka ushize Ice Prince na Ali Kiba batanze ubutumwa bw'amahoro i Kigali
Uyu mwaka, mu bahanzi bazasangira urubyiniro na Knowless harimo na Fally Ipupa
REBA HANO INDIRIMBO "KO NASHIZE" YA KNOWLESS:
Eng
RSS 
TANGA IGITECYEREZO