Israel Mbonyi; umuhanzi nyarwanda ukunzwe n’imbaga nyamwinshi mu ndirimbo zo kuramya no guhimbaza Imana, agiye kwerekeza mu gihugu cy’u Bubiligi aho azataramira abakunzi be muri uku kwezi gutaha kwa Gicurasi, nyuma yaho akazagenda anakora ibindi bitaramo mu bihugu by’i Burayi na Amerika.
Mu kiganiro yagiranye n’umunyamakuru wa Inyarwanda.com, Israel Mbonyi yatangaje ko yatumiwe mu gihugu cy’u Bubiligi aho azakorera igitaramo tariki 28 z’ukwezi gutaha kwa Gucurasi, ubu imyiteguro ikaba igeze kure cyane ko azaririmba umuziki w’umwimerere (Live), ndetse n’ibyangombwa bimwemerera kugenda nabyo akaba yaramaze kubishyikira.
Israel Mbonyi avuga ko kuwa Mbere tariki 25 Mata 2016 aribwo azahaguruka ku kibuga cy’indege mpuzamahanga cya Kigali giherereye i Kanombe, ariko agafata indege imujyana mu gihugu cy’u Buhinde aho yakunze kuba cyane mu gihe yigaga amasomo ye ya Kaminuza, muri iki gihugu akaba ari ho azava tariki 13 Gicurasi 2016 yerekeza i Burayi mu gihugu cy’u Bubiligi, hanyuma kuwa Gatandatu tariki 28 Gicurasi 2016 akorere igitaramo mu mujyi wa Bruxelles.
Israel Mbonyi mu gitaramo aheruka gukorera muri Hoteli Serena ya Kigali umwaka ushize
Israel Mbonyi yabwiye umunyamakuru wa Inyarwanda.com ko afite n’ibindi bitaramo bitandukanye ku mugabane w’u Burayi aho abantu benshi bo mu bihugu binyuranye bakomeza kumusaba ko yazajya kuhakorera ibitaramo, ndetse hakaba n’ibyo ateganya muri Amerika, gusa ibi byose akaba adashobora gutangaza amakuru menshi kuri byo mu gihe atararangiza kugirana nabo amasezerano ajyanye nabyo.
Israel Mbonyi ni umuhanzi ukiri muto ariko ufite impano n’ubuhanga muri muzika yo kuramya no guhimbaza Imana, indirimbo ze nka Number One, Ku musaraba, Nzi ibyo nibwira, ku migezi, Ndanyuzwe n’izindi zikaba zarigaruriye imitima ya benshi mu banyarwanda baba mu gihugu no hanze yacyo.
Eng
RSS 
TANGA IGITECYEREZO