Inzira ya muzika ya Christopher wavaga mu Nyakabanda ajya i Remera n’amaguru, yifuza ifoto na The Ben, Meddy...

Tariki 30 Mutarama 1994, zari impundu n’ibyishimo mu rugo rwa Butera Juvenal na Gahongayire Marie Nativitas ruherereye mu Nyakabanda mu mujyi wa Kigali. Bari bibarutse umwana w’umuhungu, mu minsi micye baba bamwise Muneza Christophe.

Muneza Christophe uzwi nka Christopher (uri hagati) yakunze muzika ari muto

Uyu mwana w’umuhungu yakuze agaragaza imbuto y’urukundo rwa muzika, kuburyo ari umwana muto cyane, yiga mu mwaka wa gatatu w’amashuri abanza, Muneza Christophe yari afitiye muzika urukundo ruhambaye nk’uko yabishimangiye mu kiganiro kirambuye yagiranye n’umunyamakuru wa Inyarwanda.com.  Icyo gihe agitangira amashuri abanza, yaririmbaga muri Korali y’abana yo kuri Kiliziya ya Santarari ya Mutagatifu Kizito mu Nyakabanda.

Christopher yabyirutse akunda muzika kandi afite inyota yo kuba umuhanzi

Uko yakuraga, yagendaga arushaho gukunda umuziki cyane maze atangira kujya yigana abahanzi bari bakomeye icyo gihe nka Corneille Nyungura, Cecile Kayirebwa, Michael Jackson n'abandi. Yagerageje ibintu byinshi yabonaga bishobora kumuzamurira umuziki, aho yagiye ashinga amatsinda y’abahanzi ashakisha imbaraga zatuma azamuka akaba umuhanzi ukomeye.

 Urukundo yakundaga muzika rwatumaga ava mu Nyakabanda akajya i Remera n’amaguru

N’ubwo atari umuhanzi uzwi icyo gihe, Christopher avuga ko yari afite ijwi ryashimwaga n’abantu bari bamuzi neza, kuburyo hari mubyara we wigeze kumusaba ko yamuririmbira mu ndirimbo ye yari arimo gukorera muri Studio y’i Remera mu Giporoso, gusabwa ibi bikaba byaramushimishije kuko yumvaga ari amahirwe abonye yo kwimenyereza inzu zitunganyirizwamo indirimbo.

Muri icyo gihe, Muneza Christophe yavaga mu Nyakabanda n’amaguru, agaca i Nyamirambo, akagenda akagera i Remera n’amaguru akaza no gutaha n’amaguru, ariko icyo gihe izo mvune ntacyo zari zimubwiye kuko yumvaga yifuza cyane kubona amahirwe yo kugera ahatunganyirizwa indirimbo. Yari afite inyota yo kuzavamo umuhanzi ukomeye, ariko yabonaga ari ibintu bigoye cyane kuko ntawe yari afite umufasha.

Bamwe mu bahanzi bagenzi be, yahoze yifuza kuba yakwifotozanya nabo

N’ubwo muri iyi minsi kubona Christopher ahagararanye n’abandi bahanzi bagenzi be wabibona nk’ibisanzwe ndetse ukabifata nk’aho ari ibyamamare bibiri byahuye, Christopher we yigeze no kugira inzozi zo kwifotozanya n’abahanzi nka Mani Martin, Meddy, The Ben na Aline Gahongayire, icyo gihe hari mu myaka ya za 2009 ubwo bo bari bamaze kumenyekana mu muziki.

Uburyo Christopher yahuye na Clement akinjizwa muri Kina Music

Mu kiganiro Inyarwanda.com yagiranye na Ishimwe Clement uyobora Kina Music, yadusangije inzira yamuhuje n’uyu muhanzi ndetse n’uburyo akimubona bwa mbere we na bagenzi be bamutangariye cyane. Mu mpera z’umwaka wa 2009 nibwo Kina Music yateguye amarushanwa yo gutoranya umuhanzi bagombaga gukorana mu myaka itanu yagombaga gukurikiraho. Abakemurampaka bagombaga gutanga amanota muri ayo marushanwa, bari abahanzi bakoranaga na Kina Music muri icyo gihe barimo Faycal, Miss Shanel, Aline Gahongayire na Ishimwe Clement.

Abantu b’urubyiruko barenga 300 bari bitabiriye ayo marushanwa, muri abo hakaba haragaragayemo n’umusore w’imyaka 15 witwa Muneza Christophe, akaba ari nawe wemeje abakemurampaka bakamwibazaho nk’uko Clement abishimangira.

Christopher na Ishimwe Clement bageze kuri byinshi mu myaka 7 bamaze bakorana

Clement ati: “Icyantangaje mu ndirimbo ebyiri Christopher yagombaga gukoresha ahatana, yabanje indirimbo ya Cecile Kayirebwa, nibaza umwana w'imyaka 16 uririmba indirimbo ya Kayirebwa kandi akayiririmba neza, sinjye byatangaje njyenyine n’abandi bakemurampaka byarabatangaje, birangira Christopher ari we utsinze. Nyuma yaho nibwo Kina Music yahise itangira gukorana nawe, abantu (public) ntibatinda kumva ubuhanga bwe, kuko ari mu bahanzi bakunzwe na benshi byihuse.”

Christopher asanga akwiye kwegukana igikombe cya Primus Guma Guma Super Star y'uyu mwaka

Clement ntashima gusa impano n'ubuhanga bya Christopher, ahubwo anabona afite indi ntwaro y'inyongera izatuma agera kure mu muziki we, iyo ikaba ari imico n'ikinyabupfura bimuranga, kuburyo nta ngeso mbi ajya avugwaho cyangwa ngo agaragaze ibindi by'imyitwarire idahwitse.

Nyuma yo gutangira gukorana na Clement muri Kina Music, Christopher yateye imbere mu buryo bugaragara, agira indirimbo zakunzwe cyane ndetse atangira guhatanira ibihembo mu marushanwa ya muzika, n’ubu akaba ari mu bahanzi 10 bahatanira ibihembo bya Primus Guma Guma Super Star 6 ndetse ahamya ko ashaka kwegukana igihembo cy’uyu mwaka, ibintu ahurizaho na Ishimwe Clement umufasha umuziki.

REBA HANO INDIRIMBO "ABASITARI" YA CHRISTOPHER: