Anita Pendo ubu asigaye yitwa "Umukobwa wirwanyeho", ku munsi aryama amasaha atatu gusa cyangwa ane

Mu kiganiro kirambuye Inyarwanda.com yagiranye na Anita Pendo, yasobanuye ko iri izina yaryiswe n’inshuti ze hanyuma nawe akaza kubitekerezaho agasanga ari byo, mu byo ashingiraho avuga ko akwiye kwitwa “Umukobwa wirwanyeho” hakaba harimo kuba yaranyuze mu maboko y’abanzi benshi akabasha kwirwanaho.

Anita Pendo, ubu asigaye yitwa "Umukobwa wirwanyeho"

Anita ati: “Mu buzima busanzwe no mu kazi, naciye mu maboko y’abanzi benshi. Nagiye nkora akazi gatandukanye nta kuruhuka, abantegaga imitego nkihagararaho. Gukora kuri radio mu gitondo, nyuma ya saa sita ngakora akazi k’ubu MC ndetse no gukora iby’ubu Dj ninjoro ntabyo kuryama, ubwo sinabariyemo n’indi mirimo isanzwe yo mu buzima bwa buri munsi”.

Anita Pendo akora akazi kenshi kandi gatandukanye

Nk’uko Anita yakomeje abitangariza Inyarwanda.com, akazi kenshi akora gatuma aryama amasaha atatu gusa cyangwa ane ku munsi, cyane ko uretse n’ako kazi kose akora anafata umwanya wo gukurikirana amasomo ye muri Kaminuza ya Mont Kenya aho akomeje kwiga ibijyanye n’Itangazamakuru.

Anita kandi avuga ko n’ubwo abantu bashobora kwibaza ukuntu ari we wirwanyeho kandi byose abishobozwa n’Imana, we yumva Imana yaramurwanyeho cyane ariko kandi ikaba ifasha uwifashije kandi iyo umuntu abuze ubwenge Imana nayo ikaba imureka.

Anita Pendo akunda kugaragara ku rubyiniro ashimisha abantu mu buryo bunyuranye

N’ubwo ariko Anita akora cyane kandi akaba yiyumva nk’uwirwanaho, ibi ngo bishobora kuzahinduka mu gihe azaba yamaze gushaka umugabo, cyane ko ubu anavuga ko atazongera gutakaza igihe mu rukundo ahubwo ategereje gukundana n’uwo bazarwubakana. Aha Anita yagize ati: “Ubundi ku bemera Imana habanza Imana n’umuryango hanyuma akazi kakaza nyuma, ubwo umugabo azakomereza aho nzaba ngeze”.

Manirakiza Théogène