P. Diddy yahakanye ibyaha bishya aregwa birimo ubucuruzi bw’abantu n’ubusambanyi bushukana

Ibi birego bishya byashyizwe mu nyandiko y’urubanza rwo ku wa Gatanu tariki 4 Mata 2025, bikaba bigaragaza ko Combs aregwa icyaha kimwe cyo kongera gutwara umuntu agamije kumushora mu busambanyi. Uyu mugore wiyise "Victim-2" (izina rye nyakuri ryahishwe ku mpamvu z’umutekano) ni we ugaragara muri ibyo birego bishya.

Combs yari asanzwe aregwa ibindi byaha bitatu birimo ubucuruzi bw’abantu, uruhuri rw’ibikorwa by’ubugizi bwa nabi no gutwara umuntu mu buryo bw’uburiganya agamije kumusambanya.

Kugeza ubu, amaze gushyirirwaho ibyaha bitanu bikomeye mu rubanza rwatangiye mu kwezi kwa Nzeri 2024.

Ku wa Mbere tariki 14 Mata, Combs yitabye urukiko rwa Manhattan, N.Y., aho yahakanye ibyo byaha bishya. Ubutabera bwamuhaye kugeza ku wa Gatatu tariki 16 Mata, ngo we n’abamwunganira mu mategeko basabe igihe cyo kubona inyandiko z’iperereza, bishobora gutuma urubanza rusubikwa by’agateganyo.

Umucamanza Arun Subramanian yagize ati: “Ubu turi gukora nk’igare ryihuta ryerekeza ku rubanza.”

Umwunganira, Marc Agnifilo, yavuze ko bashobora gusaba ikiruhuko cy’icyumweru kimwe cyangwa bibiri kubera ibibazo bishingiye ku nyandiko z’iperereza, cyane ko umwe mu batangabuhamya atigeze asabwa gutanga ubutumwa bugera ku bihumbi 200 yandikiranye na P.Diddy, ahubwo akohereza ibyo we ubwe yifuje gutanga.

Gutoranya abacamanza (jury selection) biteganyijwe gutangira ku wa 5 Gicurasi.

Mu kirego gishya, ubushinjacyaha buvuga ko Combs yashutse, agashimuta, akanashora Victim-2 mu busambanyi yitwaje amafaranga kandi akoresheje iterabwoba, ibinyoma n'ubushukanyi. Icyaha cy’ubushukanyi na cyo cyongewe mu birego bishya.

Nubwo ibi birego bishya byagaragajwe, ubushinjacyaha bwavuze ko ari ibintu byari bimaze igihe biri mu iperereza, kandi ngo bigaragaramo abagore bari inshuti za hafi za Combs, aho we n’abamwunganira bavuga ko ibyo byabaye mu rukundo nubwo nyuma rwaje gusenyuka, ariko byose byakorwaga ku bwumvikane.

Combs afungiwe muri Gereza ya Brooklyn (Metropolitan Detention Center), ariko yahakanye ibyaha byose aregwa. Inama itegura urubanza izaba ku wa Gatanu tariki 18 Mata 2025.

P. Diddy yateye utwatsi ibirego bishya aregwa