Trump arahomba cyangwa u Bushinwa burasubira ku isuka? Bite by’agapingane ka Amerika n’Ubushinwa

Benshi bakunze kubona Bambara imyambaro yakorewe mu Bushinwa bakagira ngo Amerika yo ntifite inganda nyinshi zikora imyambaro.

Benshi bakunze kumva abagura telefone bavuga ngo ‘Gura aka gaterefone ni akanyamerika’ bakagira ngo mu Bushinwa siho hakorerwa telephone nyinshi kandi zigezweho.

Amerika n’Ubushinwa ni bimwe mu bihugu bifite isoko rinini ku Isi mu bijyanye n’ubucuruzi cyane cyane bw’ibikomoka mu nganda kuko ibi bihugu byombi biri mu bya mbere bifite inganda nyinshi.

Mu mwaka wa 2023, Amerika yinjije ibicuruzwa bifite agaciro Miliyari $448.02 bivuye mu Bushinwa mu gihe ubushinwa bwo bwinjije ibicuruzwa bifite agaciro ka Miliyari $165.16 bivuye mu Bushinwa.

Ibicuruzwa byinjiye muri Amerika bivuye mu Bushinwa birimo Ibikoresho by’amashanyarazi n’ikoranabuhanga bifite agaciro ka Miliyari $126.7, Imashini zitandukanye (moteri, ibikoresho) bifite agaciro ka Miliyari $85.9, Ibikinisho n’ibikoresho by’imikino bifite agaciro ka Miliyari $33.4, Intebe, ameza n’ibikoresho byo mu nzu bifite agaciro ka Miliyari $20.3, Plastike n’ibikoresho bikozwe muri plastike bifite agaciro Miliyari $20.2 n’ibindi byinshi.

Ibicuruzwa byinjiye mu Bushinwa bivuye muri Amerika birimo ibikomoka kuri peteroli n’ingufu bifite agaciro ka Miliyari $22.4, Imashini zitandukanye ziifite agaciro ka Miliyari $20.1, Ibikomoka ku buhinzi (soya, ibigori…) bifite agaciro ka Miliyari $16.0, Ibikoresho by’ikoranabuhanga n’amashanyarazi bihagaze Miliyari $14.1, Ibikoresho by’ubuvuzi bihagaze Miliyari $13.7, Ibinyabiziga bya miliyari $10.6 n’ibindi bitandukanye.

Urebye icyuho kiri mu bucuruzi bw’ibi bihugu byombi (Market gap) usanga Amerika ariyo ifite icyuho kuko ariyo yatumije byinshi mu Bushinwa kuruta ibyo Ubushinwa bwatumije dore ko Amerika ifite igihombo cya Miliyari $282.86.

N’ubwo bimeze gutyo, Amerika niyo yafashe iya mbere mu kuzamura imisoro ku bicuruzwa bitumizwa hanze mu rwego rwo kongerera imbaraga inganda z’imbere muri Amerika no gukundisha abanyamerika ibikorerwa iwabo.

Amerika igishyiraho imisoro myinshi, Ubushinwa nabwo bwahise busubiza Amerika nabwo bushyiraho imisoro igera ku 125% ku bicuruzwa byose bikomoka muri Amerika. N’ubwo buri ruhande rufite impamvu zarwo, hari ingaruka mbi bigomba kugira kuri ibi bihugu.

Ingaruka kuri Amerika:

Byinshi mu bicuruzwa byo mu nzu, ikoranabuhanga n’imyambaro bituruka mu Bushinwa. Iyo bashyizeho imisoro myinshi, abacuruzi bo muri Amerika barahenda, bigatera izamuka ry’ibiciro.

Abacuruzi bo muri Amerika bashobora guhura n'ikibazo cyo kubura ibikoresho fatizo byari biturutse mu Bushinwa. Bimwe muri ibyo bicuruzwa nibyo bifashisha mu gukora ibindi.

Abahinzi bo muri Amerika bafite isoko rinini cyane mu Bushinwa bityo mu gihe iryo soko ryaba nk’irifunzwe kubera imisoro, babura isoko byanatuma umusaruro wabo wangirika mu gihe baba bakiri gushaka ahandi amasoko.

Ingaruka ku Bushinwa

Amerika ni isoko rinini cyane ku bicuruzwa byakorewe mu Bushinwa. Kugabanyuka kw’ibyo yoherezayo bihungabanya ubukungu bwabwo.

Ibigo bikomeye (nk’ibikora za mudasobwa, telefoni...) byagiye byimurira inganda mu bindi bihugu nka Vietnam, Mexico n’u Buhinde kugira ngo byirinde imisoro. Ibi bisobanuye kubura imirimo mu Bushinwa.

U Bushinwa bukeneye ibikomoka kuri peteroli na soya byo muri Amerika kuko byinshi mu bitumizwa muri Amerika harimo n’ibyo kurya byabasha guhaza abarenga miliyari batuye mu Bushinwa. Mu gihe byahagarara, byabanza kubera ihurizo abaturage bo mu Bushinwa.

Ibi bigaragaza ko nubwo buri gihugu kihagazeho kandi kidashaka kuva ku izima, ibi bihugu byose bigomba kugerwaho n’ingaruka zo kuzamura imisoro ariko byose rubanda giseseka akaba aribo bagomba kubigenderamo.

Ibiciro muri Amerika bizazamuka ku bicuruzwa byavaga mu Bushinwa kandi nubundi bisanzwe ari byinshi ndetse imirimo mu Bushinwa ishobora kuzacyendera mu gihe hatizwe andi mayeri.

Nyamara nubwo bimeze gutyo, buri gihugu kizi imbaraga zacyo ndetse n’aho gifite imbaraga nke byumvikana ko bishoye muri iyi ntambara bazi neza uburyo bwo kuyirwana kuko nk’Ubushinwa bufite isoko rinini ku mugabane wa Afurika, bushobora gushyira imbaraga mu kohereza ibicuruzwa byabwo ku mugabane wa Afurika hanyuma Amerika nayo ikaba yashaka izindi ngamba z’aho guhahira.