Ahabanza Hanze

Imbamutima z'abakuru b'amadini muri Congo mbere y'ibiganiro by'i Doha

Yanditswe na: Tuyihimitima Irene'
Taliki:5/04/2025 8:21 0

Ku itariki ya 9 Mata 2025, mu mujyi wa Doha muri Qatar, hateganyijwe ibiganiro hagati ya Leta ya Repubulika Iharanira Demokarasi ya Kongo (DRC) na M23, ibi biganiro byitezweho kuba intambwe mu kugarura amahoro muri aka karere.

Mu rwego rwo gushyigikira ibi biganiro, abakuru b'amadini muri DR-Congo, barimo Musenyeri Donatien Nshole, umuyobozi w'Abepiskopi Katolika muri DRC, bari gukora ingendo mu bihugu bitandukanye harimo na Leta Zunze Ubumwe za Amerika, kugira ngo basabe inkunga mpuzamahanga mu gutegura ibiganiro by'amahoro.

Musenyeri Nshole yavuze ko mbere yo kuganira ku mutungo kamere w'igihugu, ari ngombwa ko Abanye-Congo ubwabo babanza kumvikana, kuko amahoro ari yo ashobora kuzana amahirwe mu mibanire y'igihugu n'amahanga.

Nk'uko tubikesha BBC Musenyeri Nshole yagize ati: "Twari dukwiye kubanza kuganira hagati y’abanye-Congo ubwabo mbere yo gushaka kuganira ku bijyanye n’umutungo kamere wa Congo. Ntitwakagombye kwirengagiza ko amahoro ari yo yonyine azazana amahirwe mu mibanire yacu n’amahanga."

Abayobozi b'amadini basaba impande zose gushyira imbere inyungu z'igihugu, aho kubanza kuganira ku bijyanye n'amabuye y'agaciro gusa. Bashimangira ko ibiganiro hagati y'impande zose ari ngombwa kugira ngo umutekano w'iburasirazuba bwa Congo ugaruke.

Ku rundi ruhande, umujyanama mukuru wa Perezida Donald Trump kuri Afurika, Massad Boulos, wagiye muri Congo, yabwiye abanyamakuru ko yaganiriye na Perezida Félix Tshisekedi ku mubano w'ibihugu byombi. Yavuze ko amahoro adashoboka mu gihe ibikorwa by'intambara bidahagaritswe.

Ibiganiro bya Doha bizibanda ku bibazo by'ingenzi birimo gusubiza mu buzima busanzwe abarwanyi ba M23, gukuraho ibikorwa by'umutekano muke mu turere tw'iburasirazuba bwa DR-Congo no kuganira ku buryo bwo gukemura amakimbirane ashingiye ku butare.

Nubwo hari icyizere cy'uko ibi biganiro bishobora gutanga umuti, ikibazo cy'umutekano muri Congo kigaragaza uruhare rukomeye rw'ibihugu byo mu karere ndetse n'amahanga, cyane cyane mu bijyanye n'ubutare bwo muri Congo.

Musenyeri Nshole yasoje asaba amahanga gushyigikira ibiganiro by'amahoro, ashimangira ko igihe kizagera aho igihugu kigera ku bwumvikane bwo kubaka igihugu cyunze ubumwe, kitagendeye gusa ku nyungu z'amabuye y'agaciro, ahubwo ku bwumvikane bw'abanyagihugu.