Yolande Makolo yashenguwe n’urupfu rwa Alain Muku wari umwungirije

Mu gitondo cyo kuri uyu wa Gatanu ni bwo inkuru y’incamugongo yasakaye mu banyarwanda ivuga ko Alain Mukuralinda wari Umuvugizi Wungirije wa Guverinoma y’u Rwanda, yitabye Imana azize guhagarara k’umutima.

Abanyarwanda mu ngeri zitandukanye bababajwe cyane n’iyi nkuru, dore ko yari umunyapolitiki, akaba umuhanzi, akaba inshuti y’abakunzi ba siporo by’umwihariko umupira w’amaguru, ndetse n’umwe mu bantu batangaga ibitekerezo bifite ireme ku ngingo zitandukanye.

Umuvugizi wa Guverinoma y’u Rwanda, Yolande Makolo nawe ni umwe mu banyarwanda bagaragaje ko bababajwe cyane n’urupfu rw’uyu mugabo w’imyaka 55, aho yagaragaje akababaro binyuze ku rukuta rwe rwa X.

Yanditse ati: ”Umunsi w’agahinda kuri twe twese mu Biro by’Ubuvugizi bwa Guverinoma y’u Rwanda. Tubuze umunyempano, wakundaga abantu ndetse wicisha bugufi gusa turashima Imana kuba twaramumenye. Tuzakumbura umwuka mwiza yazanaga mu ikipe. Ruhuka mu mahoro n’urukundo.”

Alain Mukuralina yari Umuvugizi Wungirije wa Guverinoma y’u Rwanda kuva muri Nyakanga 2021, ariko yari asanzwe azwi mu Rwanda bitewe n’indirimbo zitandukanye ziganjemo iz’amakipe yagiye akora. Indirimbo za Alain Mukuralinda zakunzwe cyane zirimo nka Gloria, Murekatete, Tsinda batsinde, Rayon Sports, Birakomeye, Umuseke weya, n’izindi nyinshi.

Urupfu rwa Alain Mukuralinda rwababaje benshi

 Yolande Makolo ni umwe mu bababajwe n'urupfu rwa Alain Muku wari umwungirije