Abatwara ibicuruzwa b'Abanya Tanzania bahangayikishijwe n'intambara iri mu Burasirazuba bwa DRC

Umuyobozi w'Ishyirahamwe ry'Abatwara Amakamyo muri Tanzania (Tatoa), Bwana Elias Lukumay, yabwiye ikinyamakuru Mwananchi ko amakamyo yabo akiri mu gihugu kubera ko umutekano utaragaruka. Yagize ati: "Turishimira ko abashoferi bacu bagarutse amahoro, ariko 80% by'amakamyo yasigaye yibwe imizigo ndetse n'ibikoresho byayo."

Yongeyeho ko amakamyo ari mu bubiko ariyo akiri amahoro, ariko ayari mu nzira yagize ibihombo bikomeye. Bwana Lukumay yasobanuye ko badashobora gukora ubucuruzi muri Goma na Bukavu kubera intambara ikaze. Yagize ati: "Ibi bituma na leta itakaza imisoro. Urugero, ikamyo imwe isanzwe yinjiza miliyoni 7 z'amashilingi kuri buri rugendo, ayo mafaranga ubu ntakiboneka."

Yasabye ko leta za Tanzania na DRC zakoresha inzira za dipolomasi kugira ngo amakamyo asubizwe muri Tanzania. Yagize ati: "Iyi nzira yadufasha gusubukura ubucuruzi n'ibindi bihugu, kuko ibyambu bya Tanzania ari ingenzi ku bihugu birenga birindwi byohereza ibicuruzwa byabyo."

Umuyobozi w'Ishyirahamwe ry'Abatwara Amakamyo Matoya muri Tanzania (Tamstoa), Bwana Chuki Shabani, yavuze ko kubera inguzanyo zikomeje kwiyongera, bateganya gusaba amabanki guhagarika kwishyuza inyungu. Yagize ati: "Kuva amakamyo yahagarara, ba nyirayo nta mafaranga bakinjiza, nyamara inguzanyo bafashe zo kugura amakamyo zikomeje kwishyuzwa."

Yongeyeho ko bategereje itangazo rya leta rigaragaza niba ari umutekano kujya gufata ayo makamyo. Ariko, bamwe mu batwara amakamyo barimo kohereza abashoferi mu ibanga kugira ngo basubize amakamyo yabo, bikaba bibashyira mu kaga. Yagize ati: "Turakangurira ba nyiri amakamyo bohereza abashoferi mu ibanga kujya gufata amakamyo yabo kubihagarika. Barashyira ubuzima bw'abantu mu kaga. Leta yashoye imari mu kubatabara no kubacyura."

Umuyobozi w'Ishyirahamwe ry'Abashoferi b'Amakamyo muri Tanzania (Chawamata), Bwana Nuhu Mgodoka, yatangaje ko batarakira ibirego by'abashoferi basabwa kujya gufata amakamyo mu ibanga. Ariko, yavuze ko niba ibyo bibayeho, bidakwiye kwemerwa nkuko tubikesha The Citizen.com.

Umushoferi utashatse ko izina rye ritangazwa yavuze ko yagiye mu ibanga gufata ikamyo ye, kuko yatinye ko atabasha gutunga umuryango we bitabaye ibyo. 

Yagize ati: "Ntabwo tuzi igihe leta izavuga ko amakamyo ashobora gufatwa, kandi kuri twe, niho dukura imibereho yacu. N'ubwo hari ba nyiri amakamyo bashobora guhatira abashoferi kubikora, ni bake. Ibihe turimo bituma dufata uyu mwanzuro."

Yongeyeho ko bakeneye gukora kugira ngo babone ikibatunga, aho kwishingikiriza ku mishahara idahagije.Intambara mu burasirazuba bwa DRC yatangiye mu myaka ya 1990 kandi yakajije umurego mu byumweru bishize.