Kwa Nshuti na Sahabo bari inyuma! Uko Abanyarwanda bakina hanze bitwaye mu Cyumweru gishize

Duhereye muri Libya, ku wa Gatatu w'Icyumweru gishize ikipe ya Al Ahli Tripoli ikinamo Manzi Thierry na Bizimana Djihad, yatsindaga Asaria ibitego 2-1.

Kuri uyu mukino myugariro w'Amavubi wari umaze iminsi yaravunitse yari ku ntebe y'abasimbura gusa ntabwo yigeze akoreshwa mu gihe Kapiteni w'Amavubi, Bizimana Djihad we uheruka kuyerekezamo atari ku ntebe y'abasimbura.

Al Ahli Tripoli kugeza ubu iri ku mwanya wa mbere ku rutonde rwa shampiyona, ikaba izabira mu kibuga ku munsi w'ejo ku wa Kabiri ikina na Elettihad.

Muri Tunisia,ku munsi w'ejo ku Cyumweru, ikipe ya Stade de Tunisien ikinamo Mugisha Bonheur yatsindwaga na ES Tunis 2-2 ku mukino wa nyuma w'igikombe cy'igihugu. 

Uyu mukinnyi w'Amavubi ukina mu kibuga hagati afasha kugarira yari yabanje mu kibuga gusa aza gusimbuzwa ku munota wa 64.

Stade de Tunisien iri ku mwanya wa 6 ku rutonde rwa shampiyona, izasubira mu kibuga ku wa Gatatu ikina na Etoile Sportive Du Sahel.

Muri iyo shampiyona kandi ikipe ya Olympique de Beja ikinamo Ishimwe Anicet ku wa Kane yanganyaga na JS Omrane ibitego 2-2. 

Uyu mukinnyi w'Umunyarwanda ntabwo yari yabanje mu kibuga gusa yinjiyemo asimbuye ku munota wa 60. Kugeza ubu Olympique de Beja iri ku mwanya wa 9 ku rutonde rwa shampiyona, izasubira mu kibuga ikina na EGS Gafsa ku munsi w'ejo.

Muri Afurika y'Epfo,kuwa Gatandatu ikipe ya Kaizer Chiefs ikinamo Ntwari Fiacre yatsindaga Chippa United ibitego 3-0 wa 1/8 cy'Igikombe cy'igihugu.

Ntabwo uyu munyezamu w'Amavubi yari yabanje mu kibuga ndetse nta nubwo yari ku ntebe y'abasimbura. Kugeza ubu Kaizer Chiefs iri ku mwanya wa 6 ku rutonde rwa shampiyona, izasubira mu kibuga ku munsi w'ejo ku wa Kabiri ikina na Super Sport United.

Muri shampiyona y'icyiciro cya mbere muri Azerbaijani,ku wa Gatandatu ikipe ya Zira FK ikinamo Mutsinzi Ange yatsindaga Sumqayit ibitego 3-0.

Uyu myugariro w'Amavubi yari yabanje mu kibuga ndetse nta nubwo yigeze asimbuzwa. Kugeza ubu Zira FK iri ku mwanya wa 3 ku rutonde rwa shampiyona, ikaba izasubira mu kibuga ikina na Kapaz ku Cyumweru.

Muri iyi Shampiyona kandi Sabail FK ikinamo Nshuti Innocent ku wa Kabiri w'icyumweru gishize yatsindwaga na Qarabag FK ibitego 5-0. 

Uyu rutahizamu w'Amavubi yari yabanje mu kibuga gusa aza gusimbuzwa ku munota wa 89. Sabail FK kugeza ubu iri ku mwanya wa nyuma ku rutonde rwa Shampiyona, ikaba irasubira mu kibuga kuri uyu wa Mbere ikina na Sabah FK.

Muri shampiyona y'icyiciro cya Kabiri mu Bubiligi, ku munsi w'ejo ku Cyumweru ikipe ya Raal La Louviere ikinamo Samuel Gueulette yanyagiraga Lokoren-Temse ibitego 5-0.

Uyu mukinnyi w'Amavubi yari yabanje mu kibuga gusa aza gusimbuzwa ku munota wa 46. Kugeza ubu Raal La Louviere iri ku mwanya wa 3 ku rutonde rwa shampiyona, ikaba izasubira mu kibuga ikina na Patro ku Cyumweru.

Muri Shampiyona y'icyiciro cya Mbere mu Bubiligi ,ku munsi ku Cyumweru ikipe ya Beerschot ikinamo Hakim Sahabo yatsindwaga na Gent ibitego 3-2. Uyu mukinnyi w'ikipe y'igihugu y'u Rwanda, Amavubi yari yabanje mu kibuga gusa aza gusimbuzwa ku munota wa 90.

Kugeza ubu Beerschot iri ku mwanya wa nyuma ku rutonde rwa Shampiyona, ikaba izasubira mu kibuga ikina na Dender ku wa Gatandatu w'iki Cyumweru.

Ikipe ya Nshuti Innocent ikomeje kuba ku mwanya wa nyuma ku rutonde rwa shampiyona