Mashami Vincent ntiyaba ari mwiza mu mikino yo gukuranwamo gusa?

Ubwiza bw’umutoza Mashami Vincent mu mikino yo gukuranwamo buri gupimirwa mu mwaka w’imikino ushyize ndetse no mu ntangiriro z’uyu mwaka cyane ko nta kipe irahura na Police FC atoza ngo ihave amahoro.

Kuva muri Gashyantare 2024 ikipe ya Police FC itozwa na Mashami Vincent nta kipe yo mu Rwanda irabasha kuyitsinda mu marushanwa akinwa mu buryo bwo gukuranamo cyane ko n’ibikombe byose byakinywe muri ubwo buryo ikipe ya Police FC yabibitse mu kabati kayo.

Nyamara nubwo bimeze gutyo Mashami Vincent ntabwo avugwaho rumwe mu buryo ikipe atoza yitwara muri shampiyona cyane ko iba ari imwe ifite abakinnyi beza cyane ariko mu kibuga umusaruro ukaba nkene ukurikije intego ikipe ya Police FC iba ifite yo gutwara igikombe cya shampiyona.

Mu mwaka w’imikino wa 2023-24 ikipe ya Police FC yashoboye gutwara ibikombe bitatu ibikuye mu mikino yo gukuranwamo. Ibikombe yatwaye ni Igikombe cy’Amahoro, Igikombe cy’Intwari na Rwanda Super Cup.

Police FC yatwaye igikombe cy’Amahoro itsinze Bugesera ku mukino wa nyuma, itwara igikombe cy’Intwari itsinze APR FC ku mukino wa nyuma ariko yari yabanje no gusezerera Rayon Sports muri ½. Ku mukino wa nyuma wa Super Cup nabwo yongeye gutsinda APR FC iba itwaye ibikombe bitatu muri bine byakiniwe mu Rwanda iyobowe n’umutoza mashami Vincent.

Muri uyu mwaka w’imikino nabwo Mashami Vincent yaciye amarenga ko ari mwiza mu mikino yo gukuranwamo kurenza uko yitwara neza mu mikino ya shampiyona. Mu gikombe cy’Intwari Police FC yamaze gusezerera Rayon Sports muri ½ ariko ku rutonde rwa shampiyona imikino ibanza iyi kipe iri ku mwanya wa 4 n’amanota 23 ikaba irushwa amanota 13 na Rayon Sports ya mbere.

Umutoza wa Police FC Mashami Vincent uherutse gusezerera ikipe ya Rayon Sports muri ½ mu gikombe cy’Intwari, ibi yabikoze nyuma y’iminsi mikeya ikipe atoza yari ishatse kumwirukana ariko ibikubiye mu masezerano ye bikitambika maze  agumana akazi ke gutyo.

Ikipe ya Police Fc yari ishatse kwirukana umutoza Mashami Vincent kubera umusaruro mubi muri shampiyona ariko mu masezerano ye harimo ko nadatwara kimwe mu bikombe bikinirwa mu Rwanda aribwo azirukanwa, ariko ikipe ya Police FC yari yashatse kumwirukana kandi yarayihesheje ibikombe bitatu.

Kuri uyu wa Gatandatu itariki 1 Gashyantare 2025 ikipe ya Police FC itozwa na Mashami Vincent wamaze kugaragaza ko ari mwiza mu gutoza imikino yo gukuranwamo, irakina umukino wa nyuma mu gikombe cy’Intwari aho iracakirana na APR FC.

Ni ku nshuro ya kabiri yikurikiranya aya makipe arahurira ku mukino wa nyuma mu gikombe cy’Intwari kuko ubwo Police yegukanaga igikombe cyo mu mwaka ushize yagitwaye itsinze APR FC.

Mashami Vincent nubwo ikipe ya Police FC yashatse kyumwirukana yagaragaje ko ari mwiza mu mikino yo gukuranwamo