Umutoza wa Man City yateguje kuzagora uwo bazahura yahati ya Real Madrid na Bayern Munich

Manchester City yari ihanganye na Club Brugge, aho yatsinzwe igitego cya mbere mu gice cya mbere cy’umukino, ariko ibasha kwigaranzura itsinda ibitego 3-1. Iyi ntsinzi yabaye ingenzi kuko yabafashije kwirinda gusezererwa rugikubita muri iri rushanwa, ibintu bitigeze biyibaho kuva mu 2012.

Gusa, urugendo rwabo ntirworoshye kuko bashobora guhura na Real Madrid ifite igikombe giheruka cyangwa Bayern Munich, ikipe Guardiola yatoje igihe kinini. Byongeye kandi, muri Premier League, Manchester City ntirimo kwitwara neza uko byari byitezwe, kuko iri ku mwanya wa kane, irushwa amanota 12 na Liverpool iyoboye urutonde.

Nubwo City iri mu bihe bigoye, Guardiola yizera ko ikipe ye izarushaho gukomera igihe abakinnyi bakomeye bazaba bagarutse mu kibuga nyuma y’imvune, ndetse n’abakinnyi bashya nka Omar Marmoush, Abdukodir Khusanov na Vitor Reis bamaze kumenyerana n’ikipe.

Guardiola yagize ati: "Ubu ntabwo twakwegukana Champions League, ndareba ibintu mu buryo bw’ukuri. Real Madrid yongeye kugaruka mu bihe byiza, Bayern Munich nayo iri kwitwara neza cyane. Iyo tuzakina bizatugora, ariko mu byumweru bibiri biri imbere ntituzi uko bizaba bimeze. Tuzitegura neza, tugire imbaraga maze turebe uko bizagenda."

Nubwo iyi kipe imaze iminsi idahagaze neza, imaze gutsinda imikino itandatu muri umunani iheruka, inganya umwe gusa.

 Guardiola yagize ati: "Byibuze ubu turimo gutsinda imikino. Turi ku mwanya wa kane muri Premier League, ntabwo turimo guhatanira igikombe mu buryo bweruye, ariko turacyari mu irushanwa. FA Cup turacyarimo, kandi nk’uko bisanzwe, hari iminsi umuntu yumva ibintu bidashoboka, ariko ejo amarangamutima agahinduka. Ndabizi neza ko tuzagerageza gushyira Real Madrid cyangwa Bayern mu bibazo bikomeye."

Manchester City yisanze mu makipe agomba gukina kamarampaka ngo yisange muri kimwe cya Munani muri UEFA Champions League ariko byari bigoranye kuko yaje ku mwanya wa 22. 

Guardiola yakomeje Ati: "Nk’umufana, kubona ibintu byinshi bigishidikanywaho biraryoha. Ariko ikibazo ni uko twakinye imikino myinshi cyane mu Kwakira, Ugushyingo n'Ukuboza. Birumvikana ko mu bihe biri imbere amakipe akomeye azahura n’ibi bibazo nk’ibyo twahuye na byo uyu mwaka.

Twari turi hafi gusezererwa, iminota 45 gusa. Iri ni isomo rikomeye kuri njye no ku ikipe yacu, ko nta kintu twafatirana nk’aho ari icyacu burundu. Reka dushimire abakinnyi kuko bagaragaje ishema, maze turebe uko tuzaba duhagaze mu byumweru bibiri biri imbere."

Mbere yo guhura na Real Madrid cyangwa Bayern Munich, Manchester City izakina imikino ya FA Cup ndetse n’iya Premier League ishaka gusubira mu bihe byiza.

Abafana ba City bategereje kureba niba koko iyi kipe izaba ifite imbaraga zo guhatana ku rwego rwo hejuru mu kwezi gutaha.