Gukoresha ibiyobyabwenge bishobora gushyira akadomo ku rugendo rwa bamwe mu bakinnyi

Iyi gahunda igamije gukumira no guhana abakoresha bene ibi biyobyabwenge kuko bishobora kugira ingaruka mbi ku mikino ndetse no ku hazaza h’abakinnyi ubwabo.

Nuhu Asman, ukuriye Komisiyo y’Ubuvuzi no Kurwanya Imiti yongera imbaraga (Doping) mu kiganiro yagiranye na IGIHE.com , yavuze ko nubwo mu Rwanda iki kibazo kitarafata intera ndende, hari abakinnyi bagiye bahagarikwa kubera gukoresha ibiyobyabwenge.

Yagize ati: “Mu Rwanda ntabwo ikibazo cya Doping kiragera ku rwego rukomeye, ariko ntitwavuga ko kidahari. Hari abakinnyi bagiye bahura n’ingaruka zikomeye kubera gukoresha ibiyobyabwenge.”

Kugeza ubu, gupima abakinnyi byakorwaga gusa mu marushanwa mpuzamahanga nka BAL, Tour du Rwanda na Kigali International Peace Marathon. Ariko, guhera uyu mwaka, hagiye gushyirwaho uburyo bushya bwo gupima abakinnyi mu mikino itandukanye kugira ngo hamenyekane uko bihagaze mu gihugu hose.

Ibi bikaba biterwa ahanini n’igiciro cyo gupima kiri hejuru, kuko bisaba ko ibipimo byoherezwa muri laboratwari zemewe n’Ishyirahamwe Mpuzamahanga Rishinzwe Kurwanya Doping (WADA), kandi igipimo kimwe kigura hafi 1.400.000 Frw.

Mu mupira w’amaguru, hakunze kuvugwa amakuru ko hari abakinnyi bakoresha ibiyobyabwenge cyane cyane urumogi. Nuhu Asman yagaragaje ko ibi ari bimwe mu bibujijwe, aho umukinnyi ufashwe ahanishwa guhagarikwa imyaka ibiri, ndetse bishobora kugera aho ahagarikwa burundu.

Muri rusange, abakinnyi bo mu Rwanda basiganwa ku maguru ni bo bamaze guhagarikwa kubera Doping. Iyi gahunda nshya yo gupima abakinnyi benshi igamije kurushaho gukumira no guhana ababikora, ndetse inatanga ubutumwa bukomeye ku bakinnyi bose ko bagomba kwirinda ibiyobyabwenge niba bashaka kugira ahazaza heza mu mikino.