Umuvugizi wungirije wa Guverinoma, Alain Mukuralinda yavuze ko ibisasu byarashwe n’Ingabo za Congo, FARDC zifatanyije n’Umutwe w’Iterabwoba wa FDLR ku butaka bw'u Rwanda, mu karere ka Rubavu byahitanye abantu 9 naho abandi 681 bajyanwa mu nkambi kubera kubyikanga.
Ibi yabitangaje ku gicamunsi cyo kuri uyu wa Kabiri tariki ya 28 Mutarama 2025 ubwo yaganiraga na RBA.
Umuvugizi w'ungirije wa Guverinoma yavuze ko imirwano yabaye ku munsi w'ejo ku wa Mbere hagati ya M23 na FARDC na FDLR yaberaga hafi y'umupaka w'u Rwanda na Goma bityo ko hari amasasu yashoboraga kugwa ku butaka bw'u Rwanda ariko bikaba bigaragara ko byakozwe nkana na FARDC na FDLR.
Ati" Imirwano yaberaga hafi y’umupaka w’u Rwanda nanavuga ngo yaberaga ku mupaka w’u Rwanda.
Bityo rero hari amasasu ashobora kuza wenda kuko abantu bibeshye kuko imipaka yegeranye ariko ibyabaye ejo byagaragaraga ko bikozwe nkana ndetse ntekereza ko hari n’amashusho yafashwe na bamwe babona ibisasu biturukayo abandi bakabirasa.
Bivuze yuko niba hari n’ibyarashwe bivuye mu Rwanda kwari ukwikingira kugira ngo bitagera mu Rwanda".
Yashimiye abaturage b'i Rubavu bumvise inama z'abayobozi bababwiraga kwigirayo bakabikora,avuga ko hari abakomeretse,icyenda bapfuye ndetse hakaba hari n'abandi 681 bacumbikiwe mu Nkambi ya Kijote mu Murenge wa Bigogwe mu Karere ka Nyabihu kubera kwikanga ibisasu.
Ati" Dushimire rero abaturage ba hano nk'uko twahoze tubivuga ngo mujye mwumva inama abayobozi babagira haba abayobozi ba gisirakare, baba abayobozi ba gisivile kuba barabwiye bati ahangaha mwigireyo bakigirayo,bakababwira ngo kuri aya amasaha mube muri mu nzu bakabikora .
Ibyo ni ibyo gushimirwa kuko ukomoje ku mibare hari abakomeretse koko ndetse nanakubwira ko hari 9 bitabye Imana iyo bataza kumvira ayo mabwiriza byashoboraga kurushaho".
Yahakanye ibyiriwe ku mbuga nkoranyambaga ku munsi w'ejo bivugwa ko haba hari abasirikare ba FARDC na FDRL binjiye ku butaka bw’u Rwanda bakarasa bimwe mu bikorwaremezo birimo n’inzu z’ubuyobozi.
Alain Mukuralinda yavuze kandi ko kuri ubu mu karere ka Rubavu ibintu bimeze nta bisasu bikiri guturuka i Goma ndetse nta n'urusaku rw'amasasu rukiri kumvikana cyane nk'uko byari bimeze ku munsi w'ejo ku wa Kabiri.
Ku munsi w'ejo ku wa Mbere nibwo umutwe wa M23 watangaje ko wafashe Umujyi wa Goma gusa hari imirwano yakomeje kubera mu nkengero z’uwo mujyi, iturutse kuri zimwe mu ngabo zanze kumanika amaboko yanatumye abaturage bahungira mu Rwanda.
Alain Mukuralinda yavuze ko kuri ubu nta rusaku rw'amasasu ruri kumvikana mu karere ka Rubavu
Eng
RSS 
TANGA IGITECYEREZO