Perezida Gustavo Petro yemeye kwakira abimukira birukanwe nyuma y'igitutu cya Perezida Trump

Nyuma y’uko Perezida Donald Trump ashyizeho igitutu gikomeye kirimo no gushyiraho imisoro ihanitse ku bicuruzwa bituruka muri Colombia, Perezida Gustavo Petro yemeye ko indege za gisirikare za Leta Zunze Ubumwe za Amerika zitwara abimukira birukanwe muri Amerika zijya muri Colombia.

Ibi bibaye nyuma y’aho Colombia yari yagaruye indege ebyiri zari zitwaye abimukira, Perezida Petro avuga ko batitabwaho mu buryo bwubahirije uburenganzira bwa muntu.

Mu itangazo ryasohowe na White House ejo ku Cyumweru tariki 26 Mutarama 2025, ryavuze ko Perezida Petro yemeye ibisabwa byose byo kwakira abimukira birukanwe.

 Nyuma y'iki cyemezo, Leta Zunze Ubumwe za Amerika zatangaje ko ibihano by’imisoro byari byashyizweho bizahagarikwa. Gusa, ibindi bihano birimo guhagarika Viza ku bayobozi ba Colombia byatangajwe ko bizakomeza kugumaho kugeza ubwo indege ya mbere itwaye abimukira izagera muri  iki gihugu.

Perezida Donald Trump yari yamenyesheje ko azashyiraho imisoro ya 25% ku bicuruzwa byose bituruka muri Colombia, ibintu byari gutuma ubukungu bw’iki gihugu buhura n’igihombo gikomeye.

Trump yanatangaje ko ibihano bizaba birimo guhagarika ubufatanye bw’ubucuruzi n’ubundi bufasha icyo gihugu cyashoboraga gutegereza kuri Leta Zunze Ubumwe za Amerika. Mu magambo ye, Trump yagaragaje ko nta gihugu kigomba kwanga kwakira abaturage bacyo birukanwe.

Mu cyumweru gishize, Perezida Petro yari yashimangiye ko adashobora kwemera uburyo Amerika yafataga abimukira, avuga ko uburenganzira bwa muntu bukwiye kubahwa.Nyamara, nyuma y'igitutu cya Trump cyajyanye no gushyirwaho ibihano by’ubukungu, Perezida Petro yahisemo kwemera ibikubiye mu masezerano.

 Minisitiri w’Ububanyi n’Amahanga wa Colombia, Luis Gilberto Murillo, yemeje ko igihugu cye kizakomeza kwakira abaturage bacyo birukanwe ariko mu buryo bwubahirije amategeko n’agaciro k’ikiremwamuntu nk'uko tubikesha The New York Times.

Abasesenguzi bagaragaje ko iki kibazo cyateje umwuka mubi hagati y’ibihugu byombi, kikaba cyagaragaje uko umubano mpuzamahanga ushobora kwangirika igihe ibihugu bihitamo inzira yo kwinangira.

Umwanditsi : Kubwayo Jean de la Croix