APR FC yatandukanye na Chidiebere Johnson

Ibi iyi kipe yabitangaje ibinyujije ku mbuga nkoranyambaga zayo kuri uyu wa Mbere tariki ya 27 Mutarama 2025. Ikipe y'Ingabo z'igihugu yavuze ko batandatukanye ku bwumvikane bw'impande zombi ubundi imwifuriza guhirwa mu rugendo rwe rw'umupira w'amaguru.

Nwobodo Johnson Chidiebere yari yarageze muri iyi kipe mu mpeshyi y'umwaka ushize ubwo yari avuye mu ikipe ya Enugu Rangers y'iwabo muri Nigeria aho yari amaze gutwarana nayo igikombe cya shampiyona ndetse akaba yari na kapiteni wayo.

Uyu mukinnyi anyura ku mpande asatira wari witezweho byinshi ubwo yagurwaga ntabwo yigeze abona umwanya wo gukina, bikaba ari nabyo byatumye atandukana na APR FC.

Ni umukinnyi wa kabiri iyi kipe itandukanye nayo muri uku kwezi kwa Mbere nyuma ya Godwin Odibo nawe ukomoka muri Nigeria.

APR FC iheruka gusinyisha Abanya-Uganda Denis Omedi na Hakim Kiwanuka bakina basatira banyuze ku mpande.

Iyi kipe yambara Umukara n'Umweru yasoje imikino ibanza ya shampiyona iri ku mwanya wa kabiri aho irushwa amanota atanu na Rayon Sports iri ku mwanya wa mbere.

Ku munsi w'ejo ku wa Kabiri Kandi APR FC ifitanye umukino na AS Kigali mu gikombe cy'Intwari.

APR FC yemeje ko yatandukanye na Johnson Chidiebere