Ahabanza Imyidagaduro

MU MAFOTO: Ihere ijisho uburanga bw’Abanyafurika 15 bazitabira Miss World 2025

Yanditswe na: Brenda MIZERO
Taliki:22/01/2025 17:44 0

Mu gihe hagiye kongera kuba irushanwa rya Miss World ku nshuro ya 72, hamenyekanye bamwe mu bakobwa bazaryitabira barimo abagera kuri 15 bahagarariye Umugabane wa Afurika, batarimo Umunyarwandakazi.

Ubwo iri rushanwa riheruka kuba, u Rwanda rwari mu bihugu icumi byari byariyandikishije ariko biza kwikuramo. Ruheruka kugaragara mu irushanwa rya Mss World mu 2021, ubwo Ingabire Grace yaryitabiraga.

Muri Kamena 2023 ni bwo Ubuyobozi bw’Irushanwa rya Miss World bwari bwatangaje ko ku nshuro yaryo ya 71 rigiye kongera kuba, ndetse Miss Muheto yari mu bakobwa bagombaga kwitabira.

Mu mpeshyi ya 2022, byatangajwe ko Nshuti Divine Muheto wabaye Nyampinga w’u Rwanda 2022 yakuwe ku rutonde rw’abazitabira Miss World 2023.

Kugeza ubu itariki izaberaho iri rushanwa muri uyu mwaka ntiramenyekana, ariko bamwe mu bakobwa bazahatanira ikamba bamaze kumenyekana ndetse na Afurika irahagararira.

Mu bihugu byo kuri uyu mugabane bizitabira harimo Uganda, Kenya, Tanzania, Zimbabwe, Cote d'Ivoire, Togo, Tunisia, Afurika y'Epfo, Mauritius, Madagascar n'ibindi.

Iri kamba rizaba rihatanirwa n'abakobwa bahagarariye ibihugu birenga 100, ubu rifitwe na Krystyna Pyszková ukomoka muri Repubulika ya Tchèque waryambitswe ku ya 9 Werurwe 2024 i Mumbai mu Buhinde ubwo ryatangwaga ku nshuro ya 71 kuva mu 1951.

Miss World ni ryo rushanwa ry’ubwiza rimaze igihe kinini rinafatwa nk’iriruta andi marushanwa y’ubwiza yose.

Ryatangiriye mu Bwongereza mu 1951, ritangijwe na Eric Morley afatanyije n’umugore we Julia Morley ari na we wasigaye ariyobora nyuma y’uko umugabo we atabarutse mu 2000.

Eric Douglas Morley watangije Miss World yavukiye mu Mujyi wa Londres mu Bwongereza. Yahuye n’ibizazane akiri muto kuko yapfushije se agifite imyaka ibiri gusa, naho nyina apfa afite imyaka 11.

Ibi byatumye abaho mu buzima bubi akiri muto, nyuma yaje koherezwa mu gisirikare mu ngabo z’umwami, aho yabaye mu itsinda ryari rishinzwe imyidagaduro, akaba yaravuzaga ihembe.

Uku gukunda imyidagaduro byatangiye ubwo yari mu gisirikare, ni byo byamusunikiye ku gutangiza irushanwa ry’ubwiza, riba imfura mu yandi ndetse ryigarurira imitima ya benshi.

Mu ijoro ryo ku itariki ya 19 Mata 1951 nibwo umunyamideli wo muri Suède witwa Kiki Haakonson yegukanye ikamba ryari irya mbere ritanzwe. Ni irishanwa ryabereye I Londres mu Bwongereza, mu nyubako yitwa Lyceum Ballroom.

Mu 1970 ni bwo Julia Morley, umugore wa nyiri ugutangiza Miss World yaje mu buyobozi aramufasha, irushanwa ritangira kugira igikundiro bitewe n’uko ryacaga kuri za televiziyo zo mu bihugu bitandukanye ariko ni na bwo batangiye kubona amafaranga yavaga mu baterankunda.

Igikundiro cy’irushanwa cyakomeje kwiyongera uko imyaka yatambukaga, kuko nk’irushanwa ryo mu 1997 ryakurikiwe n’abarenga miliyali 2.5 bo mu bihugu 155 bitandukanye.

Mu 1978, Eric Morley yavuye mu buyobozi bwa Miss World asigamo umugore we, gusa yakomeje gushakira irushanwa amafaranga atuma ritegurwa neza n’abakobwa batwaye amakamba bagahembwa neza.

Morley yaje gutabaruka mu 2000 afite imyaka 82 asiga Miss World mu biganza by’umugore we.

Imibare itangwa n’ubuyobozi bwa Miss World yerekana ko ikurikirwa n’abarenga miliyali ku mbuga nkoranyambaga. ibihugu birenga 100 biyitambutsa ku nsakazamashusho.

Ikirango cy’ikamba rihabwa uwatwaye Miss World kiri mu ishusho y’ikamba ry’umwamikazi w’Ubwami bw’u Bwongereza Queen Elisabeth wa kabiri.

Ikamba rya Miss World rifite agaciro ka 100.000$. Rikozwe mu mabuye y’agaciro yitwa Saphire na Turquoise igizwe n’ubutare na Aluminium. Ni ikamba riba rifite uburebure bwa Centimetero 11.43.

Iri Kamba kandi riba ritatswe n’ukwezi inshuro 4 gusobanura ibihe by’ubukungu. Ririya Kamba ntabwo rihabwa umukobwa ahubwo ahabwa irijya kumera nka ryo noneho iry’umwimerere rikabikwa n’ubuyobozi bwa Miss World.

1. Miss Natasha Nyonyozi – Uganda