Uko Siporo n'Ubuhanzi by'u Rwanda byabyara amikoro mu mboni z'abasesengura iby'ubukungu – VIDEO

Mu rwego rwo kurushaho kuzamura ubuhanzi Nyarwanda n'urubyiruko muri rusange, abasesengura iby'ubukungu basanga badakwiye gukomeza kureba hafi no kumva ko bihagije ahubwo bagatangira kwigira ku bamaze kugera ku kigero cyiza.

Umwe mu bashimangira ibi, ni Dr Bihira Canisius, inzobere mu by'ubukungu akaba n'umusesenguzi mu bya politiki mpuzamahanga, uvuga ko aramutse agizwe umujyanama mu by'ubukungu muri Minisiteri y'Urubyiruko n'Iterambere ry'Ubuhanzi yabagira inama yo kwigira ku bihugu byateye imbere.

Yabwiye InyaRwanda Tv ati: "Nabagira inama yo gukora nk'ibindi bihugu byateye imbere. Ubundi kugeza ubungubu mu rwego rw'ubuhanzi, usanga muri Amerika ariho hari abahanzi bakomeye cyane. Mu rwego rw'imikino, i Burayi cyane cyane mu Bwongereza, ni ho ha mbere hari amakipe akomeye."

"Njyewe rero inama nabagira, ku bahanzi bakopera muri Amerika, ariko hari n'ibihugu bitwegereye nka Nigeria, na yo ifite abahanzi bakomeye, tukaba twayigenderaho natwe tugatera imbere."

Dr Bihira akomeza avuga ko ku byerekeranye na Siporo, Abanyarwanda bakwiye kurebera ku bihugu bimaze gutera imbere muri iki gisata, birimo u Bwongereza, Argentine, Brazil, Espagne, u Butaliyani, n'ibindi.

Ati: "Mbese tukarebera aho ngaho natwe amakipe yacu agakomera, akajya mu ruhando mpuzamahanga, agatangira akinjiza amafaranga."

Ni mu gihe no mu minsi ishize, Perezida Paul Kagame yatangaje ko siporo ikwiye kubyazwa amikoro binashingiye ku kuzamura impano z'abakiri bato.

Ku wa 14 Ukuboza 2023, nibwo Guverinoma y’u Rwanda yatangaje ko yakoze impinduka zigamije guteza imbere no gushyigikira politiki y’ubuhanzi n’umuco aho yahinduriye inshingano Minisiteri y’Urubyiruko kugira ngo izabashe kuzinoza.

Muri iri tangazo ryashyizwe ahagaragara n’Ibiro bya Minisitiri w’Intebe rivuga ko izi mpinduka zakozwe zigamije guteza imbere no gushyigikira politiki y’ubuhanzi n’umuco.

Ibyo byatumye Minisiteri y’Urubyiruko yongererwa inshingano z’ubuhanzi zari zisanzwe muri Minisiteri y’Ubumwe bw’Abanyarwanda n’Inshingano Mboneragihugu (MINUBUMWE), ihinduka Minisiteri y'Urubyiruko n'Iterambere ry'Ubuhanzi (MoYA).

Guhabwa izo nshingano byatumye kandi ihindurirwa izina ikitwa Minisiteri y’Urubyiruko n’Iterambere ry’Ubuhanzi, aho kuba iy’urubyiruko nk’uko byari bisanzwe.

Ubuhanzi Nyarwanda ni kimwe mu bikomeje gutera imbere uko iminsi itashye, cyane ko abakora ubuhanzi butandukanye mu Rwanda bakomeje kugaragaza ibihangano byabo ku ruhando mpuzamahanga.

Urwego rw’ubuhanzi ni rumwe mu rukeneye kwitabwaho cyane ko rukomeje kugaragaza ko rushobora kugira byinshi rugeza ku bantu b’ingeri zitandukanye yaba ababukora ndetse n’igihugu muri rusange.

Kanda hano urebe ikiganiro twagiranye na Dr Bihira Canisius wakomoje ku cyakorwa mu guteza imbere Siporo n'Ubuhanzi mu Rwanda