Bite bya Mashami Vincent muri Police FC?

Mu gitondo ikipe  Police FC yongeye gusubukura imyitozo mu rwego rwo kwitegura imikino yo kwishyura ya Shampiyona ndetse n’Igikombe cy’Intwari. Iyi kipe yatojwe n’umutoza Mashami Vincent, umaze iminsi hari amakuru yavugwaga ko yamaze kwirukanwa.

Nyuma yo gutsindwa na Rayon Sports ibitego 2-0, byatumye Police FC isigara inyuma amanota 13 ugereranyije n’abayoboye urutonde rwa shampiyona, havuzwe cyane ko Mashami yirukanwe. Gusa, umwanzuro wo kumusezerera ntiwigeze ufatwa, kubera impungenge z’ingaruka zashoboraga kugera ku mpande zombi.

Mashami Vincent, umaze imyaka ibiri n’igice atoza iyi kipe , afite ikibazo gikomeye cyo guhagarara ku nshingano ze muri uyu mwaka. Abakunzi ba Police FC bavuga ko barambiwe kubura intsinzi, kandi ibitekerezo byo gushaka umutoza mushya bikomeje gututumba.

Uyu mutoza asigaranye amezi atandatu ku masezerano ye yahawe nyuma yo guhesha Police FC Igikombe cy’Amahoro muri Gicurasi 2024. Icyakora, uyu mwaka w’imikino wabaye ingorabahizi, cyane ko iyi kipe yari yiyubatse bikomeye mu mpeshyi ishize kugira ngo yitware neza muri CAF Confederation Cup, ariko isezererwa hakiri kare, itarenze ijonjora rya mbere.

Police FC iracyafite gahunda yo gushaka intsinzi mu mikino yo mu gihugu ndetse no kongera kwisanga mu marushanwa ya Afurika. Muri iyi gahunda, iherutse gusinyisha Byiringiro Lague, umukinnyi wahoze akinira Sandvikens IF yo muri Suède, kugira ngo azayifashe kongera guhatana ku rwego rwo hejuru.

Ubu abakunzi bayo bategereje kureba niba Mashami Vincent azashobora kuzahura umusaruro w’iyi kipe, cyangwa niba bizarangira yirukanwe cyane ko amakuru ahari ari uko ikipe ya Police Fc iri mu biganiro n’umutoza Ben Moussa wahoze yungirije muri APR FC.