Ahabanza Imikino

Abanyabigwi barimo ubitse igikombe cya UEFA Champions League nibo bazifashishwa muri tombola ya CHAN 2024

Yanditswe na: Aloys Niyonyungu
Taliki:13/01/2025 15:34 0

Abanyabigwi b'ikipe y'igihugu ya Kenya, Tanzania na Uganda ari bo McDonald Mariga ubitse igikombe cya UEFA Champions League, Mrisho Ngasa na Hassan Wasswa bazifashishwa muri tombola y'igikombe cya Afurika cy’Abakina imbere mu bihugu byabo (CHAN 2024).

Kuwa Gatatu tariki ya 15 Mutarama 2025 mu nyubako ya Kenyatta International Conventional Centre iherereye i Nairobi ni bwo hategerejwe tombola y'imikino ya CHAN 2024.

Mbere yuko iba, Impuzamashyirahamwe y'umupira w'amaguru ku mugabane w'Afurika, CAF, yatangaje ko Hassan Wasswa ukomoka muri Uganda, Mrisho Ngasa ukomoka muri Tanzania ndetse na McDonald Mariga ari bo bazifashishwa nk'abafite ibyo bafashije amakipe y'ibihugu byabo ndetse bakaba baragize itafari bashyira ku mupira w'amaguru.

Hassan Wasswa yabaye igihe kinini mu mupira wa Uganda, akinira ikipe y'igihugu imikino 75 ndetse yanakinnye hanze mu bihugu bya Turukiya na Arabia Saudite mbere yuko asezera kuri ruhago muri 2021.

Mrisho Ngasa afatwa nk'umwe mu bakinnyi beza b'umupira w'amaguru babayeho mu karere ka Afurika y'Iburasirazuba. Ni we mukinnyi wa kabiri wakiniye ikipe y'igihugu ya Tanzania imikino myinshi aho yanayitsindiye ibitego 25. Yanakiniye amakipe 3 akomeye mu gihugu cya Tanzania ariyo Simba SC,Yanga SC ndetse na Azam FC.

Mariga nawe uzifashishwa muri iyi tombola yatwaye igikombe cya UEFA Champions, igikombe cya shampiyona y'u Butaliyani ibikombe bibiri by'igihugu cy'u Butaliyani ubwo yakiniraga ikipe ya Inter Milan. Usibye ibi kandi yanatwaranye n'iyi kipe igikombe cy'Isi cy'amakipe cya 2010.

Niwe mukinnyi wa mbere ukomoka muri Kenya washoboye gukina irushanwa rya UEFA Champions League. McDonald Mariga yanakiniye andi makipe arimo ayo muri Sweden no muri Espagne anakinira ikipe ye y'igihugu imikino 40 aho yatsinzemo ibitego 5. Uyu asanzwe avukana n'undi munyabigwi wakinnye muri Premier League ari we Victor Wanyama.

Aba banyabigwi batoranyijwe muri ibi bihugu bijyanye nuko aribyo bizakira CHAN ya 2024 izakinwa kuva tariki ya 1 Gashyantare kuzageza tariki ya 28, 2025.