Bisabye amasegonda ya nyuma ngo APR FC ikure amanota 3 kuri Marine FC

Ni mu mukino wakinwe kuri uyu wa Gatatu tariki ya 8 Mutarama 2025 Saa Cyenda kuri Stade Umuganda mu Karere ka Rubavu.

Ikipe ya APR FC yatangiye umukino ariyo ihererekanya umupira neza gusa kugera imbere y'izamu rya Marine FC bikaba ikibazo.

Ku munota wa 13 iyi kipe y'Ingabo z'Igihugu yaje kubona uburyo buremereye imbere y'izamu ku mupira mwiza Tuyisenge Arsene yarahaye Dushimimana Olivier 'Muzungu' gusa ateye umupira unyura impande y'izamu gato cyane.

Ikipe ya Marine FC nayo yaje kubona uburyo imbere y'izamu rya APR FC ku mupira mwiza waruzamukanywe na Suley Sanda, awuhindura kwa Mbonyumwami Taiba ashyiraho agatsitsino ariko birangira ba myugariro batabaye, bashyira umupira muri koroneri.

Hari aho ikipe ya Marine yashoboraga kubona penaliti ubwo Ndombe yari ategewe mu rubuga rw'amahina gusa umusifuzi avuga ko hari habayemo kurarira.

Mbere y'uko igice cya mbere kirangira, amakipe yakiniraga hagati mu kibuga gusa APR FC ikanyuzamo ikagerageza gusatira binyuze kuri Tuyisenge Arsene ariko ntibikunde.

Igice cya mbere cyarangiye amakipe yombi anganya 0-0. Igice cya kabiri cyatangiye ikipe ya Marine FC ikora impinduka mu kibuga hajyamo Twizerimana Mubarakh asimbuye Ndombe .

 Ku munota wa 49 uyu Usabimana Olivier wari winjiye mu kibuga asimbuye, yaje gufungura amazamu ku ishoti riremereye yari arekuye riruhukira mu nshundura ku mupira yarahawe na Nizeyimana Mubarakh.

Nyuma yo gutsindwa APR FC yahise akora impinduka mu kibuga havamo Dushimimana Olivier 'Muzungu' na Taddeo Lwanga hajyamo Kwitonda Alain Bacca na Dauda Yussif.

Ku munota wa 59 Kwitonda Alain Bacca wari winjiye mu kibuga asimbuye yatsinze igitego cyo kwishyura ku ishoti riremereye yari arekuriye kure, riragenda rinyeganyeza inshundura..

Nyuma y'uko Nyamukanagira ibonye igitego cyo kwishyura yakomeje gusatira ishaka igitego cy'intsinzi abarimo Tuyisenge Arsene bagerageza uburyo gusa ntibikunde.

Umukino ubura amasegonda macye ngo urangire, ikipe ya APR FC yabonye igitego cya Kabiri gitsinzwe na Ruboneka Jean Bosco ku mupira muremure yarekuye maze umunyezamu wa Marine FC agerageje kuwukuramo biranga.

Ikipe y'Ingabo z'igihugu yatahanye amanota ku intsinzi y'ibitego 2-1 mbere y'uko ijya gukina n'Amagaju FC ku Cyumweru mu mukino usoza igice kibanza cya shampiyona.

Uyu mukino kandi warebwe n'abakinnyi babiri bakomoka muri Uganda baheruka kugurwa na APR FC aribo Hakim Kiwanuka na Denis Omedi.

APR FC yakomeje kuba ku mwanya wa Kabiri ku rutonde rwa shampiyona aho irushwa amanota atanu na Rayon Sports iri ku mwanya wa mbere .

Ruboneka Jean Bosco wafashije APR FC kubona amanota 3