Juventus, AC Milan na Brussia Dortmund mu makipe ashaka Marcus Rashford

Ibi byaje nyuma y’uko Rashford atangaje ko yifuza impinduka nshya mu mwuga we, nyuma yo gutakaza umwanya we mu ikipe ya mbere ya Manchester United itozwa n’umutoza Ruben Amorim.

Nk’uko bigaragara mu kinyamakuru Sky Sports, Borussia Dortmund iri gutekereza ku buryo bwo gusinyisha Rashford muri uku kwezi kugira ngo asimbure rutahizamu Donyell Malen, ushobora kwerekeza muri Aston Villa.

Juventus nayo iri gushaka uwo gukinana na Dusan Vlahovic mu busatirizi, kandi Rashford ari ku rutonde rw’abakinnyi barebwa n’iyi kipe.

AC Milan nayo yo mu utaliyani iri kuganira na Man United uko yatira Rashford, ariko bigasaba ko Manchester United yishyura igice kinini cy’umushahara we kuko ari munini.

Marcus Rashford akomeje kugaragaza imbaraga zo gushaka indi kipe ashobora kwerekanamo impano ye, nyuma yo kubona ko byagorana kugaruka mu ikipe ya mbere ya Manchester United. Gusa, umutoza Ruben Amorim yavuze ko Rashford afite amahirwe yo kugaruka mu ikipe, ariko agomba kwerekana ko abikwiye.

AC Milan na Juventus nubwo nazo zishaka Rashford ziracyafite imbogamizi ku mushahara we keretse United yemeye kwishyura igice kinini cy’uwo mushahara. N’ubwo byaba gutizwa gusa, hari amahirwe ko Rashford ashobora kuzitwara neza, bityo agashyirwa ku isoko mu mpeshyi ku giciro kiri hejuru.

Rashford, n’ubwo amaze igihe atitwara neza, ni rutahizamu ufite impano ikomeye kandi ushobora kwigaragaza neza mu gihe cyiza. Ibi ni byo byatumye amakipe nka Borussia Dortmund, AC Milan, na Juventus amugirira icyizere.

Ku rundi ruhande, Joshua Zirkzee wa Manchester United yavuze ko adashaka kuva muri iyi kipe. N’ubwo amakipe yo muri Serie A nka Juventus, Napoli, Inter Milan ndetse n’andi yo muri Premier League yashatse kumusinyisha, Zirkzee yavuze ko akunda Manchester United kandi yifuza kwerekana ubushobozi bwe muri Premier League.

Umwanzuro: Ese Marcus Rashford azerekeza mu yindi kipe muri uku kwezi cyangwa azaguma muri Manchester United akagerageza kugarura umwanya we? Icyizere cy’uko ashobora gutizwa gikomeje kwiyongera, kandi bishobora kumufasha kongera agaciro ke ku isoko. 

Ku rundi ruhande, Zirkzee yiyemeje kuguma muri United, aharanira kwerekana ko ashoboye mu marushanwa akomeye y’uyu mwaka.

Amakipe akomeye ku mugabane w'iburayi akomeje kwifuza Marcus Rashford

Juventus, AC Milan na Dortmund ku isonga mu makipe ashaka Rashford