APR FC yaguze rutahizamu wahanganiye ibihembo na Alejandro Garnacho

Uyu mukinnyi wagaragaje ubushobozi bukomeye mwaka w’imikino ushize aho yatsinze ibitego 14, yari asigaye afite amasezerano y’amezi atandatu muri Kitara FC yo mu Cyiciro cya Mbere muri Uganda.

Uretse muri shampiyona ya Uganda Denis yafashije igihugu cye kubona itike yo kwitabira CAN 2025, atsinda ibitego bikomeye birimo icyo yatsinze Bafana Bafana yo muri Afurika y’Epfo ndetse na Sudani y’Epfo.

Mu bindi byatumye izina ryOmedi Denis rimenyekana, harimo igitego yatsinze KCCA muri Kanama 2024 muri Shampiyona ya Uganda, kikaza mu bitego 11 byatoranyijwe mu bihembo bya ‘FIFA Puskás Awards.’ Iki gitego cye cyaje ku mwanya wa gatatu muri ibyo bihembo aho yahigitswe n’igitego cya Alejandro Garnacho wa Man United.

Biravugwa ko Omedi yasinyiye iyi kipe ejo  ku wa Mbere, ahabwa amasezerano y’imyaka ibiri kugira ngo afashe iyi kipe y’Ingabo kongera ubushobozi mu busatirizi.

Muri APR FC, Omedi azakina ahangana ku mwanya w’ubusatirizi n’abakinnyi nka Victor Mbaoma, Mamadou Sy na Tuyisenge Arsène, usigaye ukoreshwa mu busatirizi. Uyu ni umukinnyi wa kabiri APR FC isinyishije muri uku kwezi, nyuma ya Hakim Kiwanuka wavuye muri Villa SC.

APR FC yasinyishije Denis Omedi wahanganiye igihembo na Garnacho cya FIFA Puscas Award