Gitego Arthur ashaka gusezera muri AFC Leopards kubera ibibazo birimo 'Umutekano'

Nyuma yo kugera muri iyi kipe muri Gashyantare 2024 avuye muri Marines FC yo mu karere ka Rubavu, Gitego yitwaye neza mu ntangiriro ariko ibibazo by’ubuyobozi n’imikoranire byahinduye byinshi.

Gitego yageze muri AFC Leopards afite intego yo kwigaragaza muri shampiyona ya Kenya, kandi yitwaye neza mu ntangiriro aho yatsindaga ibitego by’ingenzi. Nyamara, ibintu byahinduye isura ubwo umutoza wamuzanye yirukanwaga, bigatuma umwanya we mu ikipe utangira kugerwaho n’ibibazo.

Gitego yagize ati "Nashatse gutandukana na bo nkigera muri ibi bihe, ariko barabyanze. Numvaga nakomereza ahandi kuko nari mfite amahirwe menshi y’amakipe anyifuza, ariko ntabwo byumvikanye kubera ko abandi ba rutahizamu bari bafite batari bahagije."

Uretse ibibazo by’imikoranire, Gitego yavuze ko ubuzima muri Kenya butoroshye, cyane cyane ku bakinnyi b’abanyamahanga. Yagize ati: “Ntabwo ntekanye haba mu mutekano no mu mubano n’abafana. Iyo ibintu bitagenze neza, abafana bashobora no kwinjira mu kibuga bakagukubita.”

Iki kibazo cy’umutekano cyatumye atangira gushaka uburyo yava muri iyi kipe. Yongeyeho ati: "Nubwo nasinye imyaka ibiri, nari niteguye gukina umwe gusa nkerekeza i Burayi. Ariko ibyo basabaga amakipe yanyifuzaga byari hejuru cyane ku buryo harimo amananiza."

Nyuma yo guhura n’imvune yatumye amara amezi abiri hanze y’ikibuga, Gitego yongeye gusaba gutandukana na AFC Leopards ariko biranga. Ati: "Nabandikiye ibaruwa isaba gutandukana ariko ntibasubiza. Ubu ngomba kwihangana nkasoza amasezerano mfitanye n’ikipe."

Nubwo afite ibi bibazo, Gitego yavuze ko agifite inzozi zo gukina ku rwego rwo hejuru i Burayi kandi yizeye ko azabigeraho. Ati: "Ndacyafite icyizere cyo kubona amahirwe mu minsi iri imbere kandi nzakomeza gukora cyane."

Gitego Arthur arifuza gutandukana na AFC Leopards yo mu gihugu cya Kenya