Uganda: Impanuka y'imodoka yahitanye umunyamakuru, umugore we n'abana barakomereka

NTV yatangaje ko abanyamakuru n'abaturage bo muri Uganda bari mu kababaro gakomeye nyuma y'urupfu rw'umunyamakuru Risdel Kasasira wapfiriye mu mpanuka y'imodoka yabaye tariki ya 3 Mutarama 2025. 

Uyu munyamakuru w'imyaka 45 y'amavuko, wahoze akorera Ikinyamakuru Daily Monitor, yitabye Imana ako kanya ubwo imodoka yari atwaye yayobye, ikarenga umuhanda ku nzira ya Kashagama, mu gace ka Kalagala Malyansimbi, mu Karere ka Lyantonde.

Kasasira yari agarutse iwe muri Kashari, mu Karere ka Mbarara, atwaye imodoka ya Toyota Corolla Fielder ifite nimero ya pull UBK 851Y, ari kumwe n'umugore we, Nshimire Charlotte, hamwe n'abana babo babiri. Nk'uko abashinzwe umutekano babitangaje, imodoka yataye umuhanda igana mu cyobo cy'amazi, maze yangirika mu buryo bukomeye.

Umugore wa Kasasira hamwe n'abana babo babiri, bafite imyaka itanu n'itatu, barokotse ariko bakomeretse bikabije. Abashinzwe umutekano bamaze kuhagera, bajyanye aba barokotse mu Bitaro bya Lyantonde aho bari gukurikiranirwa n’abaganga.

Kasasira yari umwanditsi mu bijyanye n'ubushakashatsi kandi yari umufatanyabikorwa mu kigo cy'Ubushakashatsi ku Itangazamakuru cya Afurika y'Iburasirazuba (EACIR). 

Imirimo ye yari ishingiye ku bibazo by'ingenzi birimo politiki, umutekano, imihindagurikire y'ibihe, n’ubuvuzi. Mbere yo kwinjira mu kigo cya EACIR, yari yarakoze imyaka myinshi muri Daily Monitor, ndetse akaba yari n'umukozi ku kigo cya Associated Press.

Urupfu rwa Kasasira rwashenguye benshi mu nzego z'itangazamakuru muri Uganda. Umusanzu we mu bushakashatsi no mu itangazamakuru ryimbitse wari ufite agaciro gakomeye, kandi inkuru ze zamenyekanye ku kuba zari zisesenguye kandi zitanga amakuru yizewe. 

Abavandimwe n'inshuti bamwibuka nk'umunyamakuru w’umutima mwiza waharaniraga ukuri no kubahiriza ubutabera.

Kasasira yasize umugore we n'abana babo babiri. Polisi yatangiye iperereza kugira ngo hamenyekane icyihishe inyuma y'yi mpanuka.

Risdel Kasasira, umunyamakuru wa Daily Monitor yapfiriye mypanuka y'imodoka

Umwanditsi: KUBWIMANA Solange