Musanze FC yahagaritse Shafiki Bakaki mu gihe kitazwi kubera imyitwarire idahwitse

Mu itangazo ryashyizwe hanze  n’ubuyobozi bw’ikipe, bavuze ko imyitwarire ya Bakaki itahesheje icyubahiro indangagaciro za Musanze FC zirimo ubunyangamugayo, icyubahiro, gushyira hamwe n’imyitwarire ikwiye.

Ubuyobozi bwagaragaje ko imyitwarire y’uyu mukinnyi idakwiriye kandi itajyanye n’ubunyamwuga, ibintu bidashobora kwihanganirwa mu muryango w’ikipe.

Mu ibaruwa Bakaki Shafiki yandikiwe, InyaRwanda ifitiye ivuga ko yahagaritswe guhera ku itariki ya 2 Mutarama 2025, kandi atazongera gukina kugeza igihe hazafatirwa umwanzuro ushingiye ku bushishozi.

Musanze FC yagaragaje ko iki cyemezo kigamije gutuma Bakaki afata umwanya wo gusuzuma imyitwarire ye no kugerageza gukosora amakosa yakoze.

Nubwo ubuyobozi bwa Musanze FC butigeze butangaza byimbitse ibyo Bakaki yaba yarakoze, amakuru yizewe avuga ko uyu mukinnyi yagize uruhare mu gitego cya gatatu Musanze FC yatsinzwe na Vision FC, ubwo yagaragaje ubunebwe mu kugarura umupira n’umutwe maze usanga Icyubahiro Idarus wa Vision Fc ahagaze neza, aba atsinze igitego.

Andi makuru avuga ko ubwo ikipe yageraga i Musanze, Bakaki yavuze ko atameze neza, asaba ikipe kumuha Ambulance ikamujyana kwa muganga.

Mu gitondo cyo kuri uyu wa Gatanu itariki 3 Mutarama 2025 nibwo Bakaki Shafiki yabonye ibaruwa yo imuhagarika, ubwo yari yitabiriye imyitozo.
 

Bakaki Shafiki yagaritswe muri Musanze Fc mu gihe kitazwi

Ibaruwa yandikiwe Bakaki Shafiki