2024 ni umwaka mwiza ku bukungu bw'Igihugu cyacu – Guverineri Rwangombwa

Nubwo bigoye cyane kuri benshi kwiyumvisha uko umwaka wa 2024 wabaye mwiza ku bukungu bw'u Rwanda, Guverineri wa Banki Nkuru y'u Rwanda, John Rwangombwa yabisobanuye, ndetse anatangaza ko bimwe mu bibazo birimo izamuka ry'ibiciro ku masoko no guta agaciro kw'ifaranga byagabanutse ku buryo bugaragara.

Yagize ati: "Navuga ko 2024 ari umwaka mwiza ku bukungu bw'Igihugu cyacu, kuko iyo urebye n'imyaka ibiri ishize cyangwa se guhera nyuma ya Covid-19, ubukungu bwateye imbere neza."

Guverineri Rwangombwa yagaragaje ko kuzahuka k'ubukungu bw'u Rwanda kwatangiye mu 2021, aho iterambere ry'ubukungu ryazamutseho 10.4%, naho mu 2022-2023 butera imbere ku kigero cya 8.2%. Yakomeje avuga ko biteganyijwe ko uyu mwaka ubukungu bw'u Rwanda  buziyongeraho 8.3%.

Ati: "Ariko iyo turebye aho tugeze uyu munsi, turi hejuru y' 9% mu bihembwe bitatu bya mbere by'uyu mwaka."

Asobanura impamvu umwaka wa 2024 wari ushimishije mu bukungu, Rwangombwa yagize ati: "Ni uko muri iyi myaka ishize ibiri nubwo ubukungu bwateraga imbere ariko twari dufite ikibazo cyo kuzamuka kw'ibiciro ku masoko gikarishye cyane, kikaba ari nk'inkomyi muri ibyo byiza twabonaga."

Yatangaje ko muri uyu mwaka ikibazo cyo gutakaza agaciro kw'ifaranga 'inflation' kitagaragaye cyane ugereranije n'iyo myaka ishize. Ati: "Ku ivunisha muri rusange, umwaka ushize ifaranga ryari ryataye agaciro cyane, uyu mwaka byaragabanutse hafi icya kabiri cy'uko byagenze umwaka ushize".

Guverineri yagaragaje ko ibice by'ubukungu byose birimo ubuhinzi, inganda, serivisi n'ibindi byateye imbere ugereranyije n'uko byari bimeze mu myaka ibiri ishize, aho igihugu cyahuye n'ibibazo by'ihindagurika ry'ibihe birimo n'amapfa.

Yatangaje ko muri rusange ubukungu bwifashe neza muri uyu mwaka wa 2024 uri kugana ku musozo, cyane ko Igihugu cyubakiye ku musingi ukomeye cyari kimaze kubaka mu myaka itatu ishize, avuga ko hari icyizere ko n'imbere hari kuza na bwo ubukungu buzakomeza kugana aheza.

Guverineri wa Banki Nkuru y'u Rwanda, John Rwangombwa yatangaje ko umwaka wa 2024 wabaye mwiza ku bukungu bw'Igihugu