Ni iki cyazanye Joe Biden muri Angola yuzuye amabuye y’agaciro?

Kuri uyu wa Mbere, Perezida Joe Biden yageze muri Angola mu ruzinduko rwe rwa mbere nka Perezida yari agiriye muri Afurika yo munsi y’ubutayu bwa Sahara. Ni uruzinduko rwari rumaze iminsi rutegerejwe dore ko ari rwo rwa mbere na nyuma Joe Biden agiriye muri Afurika yo munsi y'ubutayu bwa Afrika.

Uruzinduko rwa Biden, ruzamara iminsi itatu muri Angola aho ruzibanda ahanini ku gutunganya umuhanda wa gari ya moshi wa Lobito muri Zambiya, Congo na Angola. Rugamije kandi gufungurira isoko Amerika ku mabuye y’agaciro acukurwa muri iki gihugu.

Uru ruzinduko rwa Joe Biden ruzongera imikoranire mu by'ubukungu hagati y’Ibihugu byombi bagamije guhangana n'Abashinwa bakomeje kwigarurura ijambo mu Karere.

Joe Biden azagira umwanya wo gusura umujyi wa Lobito ku cyambu cya Atlantike kugira ngo arebe uko umushinga w’umuhanda wa gari ya moshi umeze.

Angola ni kimwe mu bihugu ku Isi bifite amabuye y’agaciro menshi cyane kandi y’ubwoko bwose acukurwa mu birombe bya Camafuca-Camazambo Diamond Mine, Cutato Iron Ore Mine, Cabinda Phosphate Project, Lunhinga Diamond Mine, Quitota Manganese Mine, Longonjo, Rare Earth Project, Lulo Diamond Mine, …

Biden yari yitezwe ko azasura Afurika umwaka ushize nyuma yo kubyutsa Inama y’Amerika na Afurika mu Ukuboza 2022. Urwo rugendo rwashyizwe mu 2024 rwongera gutinzwa n'uko muri uku Ukwakira habaye inkubi y'umuyaga yiswe Milton yibasiye Amerika muri icyo gihe.

Perezida wa nyuma w’Amerika waherukaga gusura Afurika yo munsi y’ubutayu bwa Sahara ni Barack Obama mu 2015. Biden we yaherukaga kwitabira inama y’umuryango w’abibumbye yiga ku mihindagurikire y’ikirere yabereye muri Egiputa muri Afurika y’amajyaruguru mu 2022.