Cherissa Tona, Anne Mbonimpa na Dr Ndugulile mu byamamare bitabashije gukandagira mu Ukuboza 2024

Buri kwezi ku isi hapfa abantu ibihumbi n’ibihumbi hirya no hino ku isi, biturutse ku mpamvu zitandukanye zirimo uburwayi, impanuka n’ibindi. Muri uku kwezi kuri kugana ku musozo rero, hari abantu b’ibyamamare mu byiciro binyuranye bitabye Imana bisiga igihombo gikomeye mu ruganda rw’imyidagaduro, muri ruhago, mu buzima n’ahandi.

Mu bantu benshi cyane b’ibyamamare byitabye Imana muri uku kwezi, InyaRwanda yahisemo kukubwira kuri bamwe muri bo bagera ku 10 gusa.

1.     Cherissa Tona

Uwanjye Cherissa Tona wari umwe mu baririmbyi b’inkingi ya mwamba mu itsinda rya Healing Worship Ministry akaba n’umuvandimwe wa Umunyana Shanitah wegukanye ikamba rya Miss East Africa 2021, yitabye Imana ku wa 3 Ugushyingo 2024, afite imyaka 23 y’amavuko.

InyaRwanda yabonye amakuru avuga ko ku wa Gatanu tariki 1 Ugushyingo 2024, Cherissa yizihije isabukuru y'amavuko, hanyuma inshuti ze zikomeza kumufasha kuyizihiza kugeza kuri iki Cyumweru tariki 3 Ugushyingo 2024 ari nabwo yasohokanaga n'inshuti ze.

Ubwo yari kumwe n'inshuti ze yakomezaga kuzibwira ko ashaka kujya kwifatanya na Korali, mu gihe yiteguraga kugenda abanza kunyura mu bwiherero. Ariko, inshuti ze zakomeje kubona ko yatinze, zitangira kwibaza uko byagenze, bagiyeyo basanga niho yaguye.

2.     Anne Mbonimpa

Anne Mbonimpa wari umukozi muri Komisiyo Ishinzwe Iterambere ry’Umupira w’Amaguru w’Abagore mu Ishyirahamwe ry’Umupira w’Amaguru mu Rwanda, FERWAFA, akaba yaranakiniye amakipe atandukanye, yitabye Imana ku gicamunsi cyo kuwa Gatandatu taliki ya 9 Ugushyingo 2024. Amakuru avuga ko Mbonimpa Anne yapfuye urupfu rutunguranye kuko atari arwaye.

Usibye kuba Anne Mbonimpa yari umukozi wa FERWAFA mu bijyanye no guteza imbere umupira w'amaguru w'Abagore ahubwo yanakinnye mu makipe atandukanye ndetse aba n'umutoza.

Yakiniye amakipe arimo Bugesera WFC, Ruhango WFC na GS Remera Rukoma. Mu mwaka ushize, yari umwe mu batozaga APR WFC bayifasha kuzamuka mu Cyiciro cya Mbere.

3.     Dr Faustine Ndugulile

Umunya-Tanzania Dr Faustine Engelbert Ndugulile wari uherutse gutorerwa kuyobora Ishami ry’Umuryango w’Abibumbye ryita ku Buzima muri Afurika, yitabye Imana kuri uyu wa 27 Ugushyingo 2024.

Dr Faustine Ndugulile wari ufite imyaka 55, yaguye mu Buhinde azize uburwayi. Ni nyuma y’igihe gito atorewe manda y’imyaka 5 yo kuyobora Ishami ry’Umuryango w’Abibumbye ryita ku Buzima muri Afurika tariki 27 Kanama 2024.

Uyu mwanya Dr. Ndugulile yari awuhataniyemo n’abakandida bane barimo Umunyarwanda Dr Mihigo Richard.

Byari biteganijwe ko azemezwa n’abagize Inama y’Ubutegetsi ya OMS muri Gashyantare 2025 agahita atangira inshingano ze. Yari yatowe asimbuye Dr. Matshidiso Moeti, wayoboraga iri shami kuva mu 2015.

4.     Kiki Hakansson

Kiki Hakansson wabaye Nyampinga wa mbere w’Isi mu 1951 yitabye Imana ku ya 4 Ugushyingo afite imyaka 95 y’amavuko. Amakuru avuga ko Kiki wakomokaga muri Sweden yaguye iwe mu rugo muri Calfornia, azize urupfu rutunguranye. Ubwo yegukanaga ikamba rya Miss World, yaryambitswe yambaye Bikini biteza impaka zikomeye ku Isi.

5.     Nyirandama Chantal

Nyirandama Chantal wari rwiyemezamirimo washinze Nice Garden Hotel ikorera mu Karere ka Gicumbi yahitanywe n’impanuka y’imodoka yabereye mu Karere ka Rulindo mu gitondo cyo ku wa 24 Ugushyingo 2024.

Iyo mpanuka yabereye ku muhanda Gicumbi-Base ubwo imodoka yo mu bwoko bwa kwasiteri (coaster) yari itwaye abanyamuryango ba FPR Inkotanyi bo muri Gicumbi berekeje mu nama i Musanze, yananirwaga gukata ikorosi igata umuhanda.