Abdou Mbarushimana utoza Vision FC yarahiriye gutsinda Rayon Sports uko byagenda kose

Kuri uyu wa Kane itariki 28 Ugushyingo 2024 Ikipe ya Vision FC yakoze imyitozo yo ku rwego rwo hejuru yitegurana imbaraga zidasanzwe umukino ifitanye na Rayon Sports kuri uyu wa Gatandatu.

Nyuma y’imyitozo, umutoza wa Vision FC Abdou Mbarushimana yatangaje ko biteguye neza umukino wa Rayon Sports, cyane ko ikipe ya Vision FC iri mu mwuka mwiza, kuko mu minsi ishize yatsinze Bugesera FC ibitego 2-1.

Abdou Mbarushimana yagize ati “Ni byo Rayon Sports ni ikipe nziza, iri kwitwara neza kuko imaze gutsinda imikino irindwi yikurikiranya, navuga ko ari akazi kazaba kadukomereye. Umugambi dufite ni ukudasubira inyuma, Imana yaradufashije dutsinda umukino duherutse gukina, kandi turashaka gukomerezaho.

Ntekereza ko Rayon Sports ariyo izaba ifite igitutu kinini kuturusha kuko iri kurwanira umwanya wa mbere, ibyo dushobora kubyungukiramo, tukabona amanota atatu."

Umutoza wa Vision FC yavuze ko gahunda ari ugutegura neza umukino, kugira ngo bazafatirane igitutu gikomeye Rayon Sports izaba ifite. Yagize ati “Tugomba gukosora ku mpade zose, tukibanda ku makosa yagiye aturanga guhera mu ntangiriro, tukagerageza gukosora udukosa tugaragara mu bwugarizi."

Umutoza Abdou Mbarushiman ukiri mushya muri Vision FC, yavuze ko n’ubwo kubaka ikipe bisaba igihe gihagije, atari urwitwazo. 

Ati “Ibintu byose byiza bisaba igihe, ntabwo ari urwitwazo, gusa ntabwo waba umaze ibyumweru bibiri utoza ngo utoze nk’umaze amezi atatu, hari ibyo uba wifuza ko abantu bakina biba bitaragerwaho 100%."

Umutoza Abdou Mbarushimana, yashimangiye ko yiyiziho ubuhanga bwo kugora Rayon Sports, aho bahuriye hose. Yakomeje agira ati “Amakipe nanyuzemo yose, aho ntatsinze Rayon Sports ushobora gusanga ari ho hakeya. 

Ndi muri AS Muhanga haba kunganya twaranganyije, ndetse no kubatsinda twarabatsinze. Muri Bugesera niho tutabashije kuyikora, ariko ndi muri Nyanza twanganyirije kuri Stade Amahaoro, muri Kibuye ndetse no muri Electro Gas naho narayigoye cyane."

Ikipe ya Vision FC iri gukubita agatoki ku kandi, iri ku mwanya wa 13 ifite amanota umunani. Nubwo ifite amanota umunani, iri kumwe n’amakipe yo mu murongo utukura kuko inganya amanota na Etincelles, Bugesera na Musanze amakipe ari mu myanya ya 12, 14 na 15.