Ruud van Nistelrooy agiye kugirwa umutoza mushya wa Leicester City.

Uyu mugabo w’Umuholandi ufite imyaka 48 azasimbura Steve Cooper wirukanywe nyuma y’iminsi 157 gusa ari umutoza bitewe n’intsinzwi ya 2-1 Leicester yatsinzwe na Chelsea ku wa Gatandatu mu mikino ya Premier League.

Van Nistelrooy agiye guhabwa uyu mwanya nyuma y’ibyumweru bibiri avuye ku mwanya w’umutoza w’agateganyo wa Manchester United, nyuma y'uko  Erik ten Hag yirukaniwe. Yatoje Manchester United mu mikino ine, atsindamo itatu anganya umwe, ariko yeguye nyuma yo kubwirwa ko atazaba mu batoza bazafatanya na Ruben Amorim.

Mu mikino yatozaga Manchester United, Van Nistelrooy yatsinze Leicester kabiri, itsinzi ya 5-2 mu mikino y’igikombe cya Carabao mu ijonjora rya kimwe cya 16, n’intsinzi ya 3-0 muri Premier League mu kwezi gushize.

Umunyabigwi wakiniye Manchester United n’ikipe y’Igihugu y’Ubuholandi, Van Nistelrooy azasanga Leicester iri ku mwanya wa 16 muri Premier League nyuma y’imikino 12, irusha inota rimwe gusa amakipe ari mu mirongo y’abamanuka mu cyiciro cya kabiri.

Steve Cooper, wari wagizwe umutoza muri iyi mpeshyi asimbuye Enzo Maresca wagiye muri Chelsea, yabashije gutsinda imikino ibiri gusa ya Premier League.

Van Nistelrooy afite ubunararibonye bwo gutoza ikipe nkuru imwe gusa igihe cy’umwaka w’imikino wa 2022-23, ubwo yatozaga PSV Eindhoven ndetse akanatwara Igikombe cy’Ubuholandi (Dutch Cup). Yaje kwinjira mu ikipe y’abatoza bungirije ba Manchester United muri Nyakanga uyu mwaka.

Ku mukino wa Leicester uzaba ku wa Gatandatu bazasura Brentford muri Premier League, ntabwo biramenyekana niba Van Nistelrooy azaba ari ku ntebe y’abatoza, ariko kubera ko hasigaye igihe gito ngo uwo mukino ube, bishoboka ko azabanza kwitegereza iyi kipe.

Umutoza w’agateganyo, Ben Dawson, wahoze mu ikipe y’abatoza ya Cooper, azakomeza kuyobora ikipe mu gihe gito.

Van Nistelrooy azaba afite inshingano zo guhuza abakinnyi bari barananiwe kwakira uburyo bwo gutoza bwa Cooper. Nubwo hari abakinnyi bakomeye nka Jamie Vardy bamushyigikiraga.

Ruud Van Nerstelrooy agiye kugirwa umutoza wa Leichester City