NBA: Atlanta Hawks yatsindiye Cleveland Cavaliers iwayo -VIDEO

Nubwo Cavaliers yatangiye neza umwaka w’imikino, ntiyahiriwe n’uyu munsi kuko yatsinzwe na Atlanta Hawks. De’Andre Hunter yatsinze amanota 26 avuye ku ntebe y’abasimbura, Jalen Johnson we yatsinze amanota 22, naho Trae Young atsinda amanota 20, anatanga imipira 22 yavuyemo amanota, bikaba ari ubwa mbere atanze umusaruro ungana gutya.

Trae Young yasoje umukino ku buryo bukomeye atsinda amanota atatu, ahagaze muri  metero 12, amanota yatumye Hawks ijya imbere ku manota 129-122 mu gihe hari hasigaye umunota umwe n’amasegonda 43. Icyo gihe, yari amaze gutakaza umupira ariko ahita agaruka akina neza.

Jalen Johnson yavuze ko imipira ya Young yavuyemo amanota ari yo yatumye batsinda. Yagize ati: “Yari ashyize imbere gutanga imipira neza akayigeza ku bakinnyi bose, abantu benshi ntibavuga cyane ku bushobozi bwe bwo gutegura umukino, nubwo ari we uyoboye shampiyona mu gutanga imipira yavuyemo amanota.”

Iyi ntsinzi yazamuye Hawks ku mwanya wa 8, Young yashimangiye ko iyi kipe yagaragaje ubushobozi bwayo bw’ukuri. Yagize ati: “Cavaliers ni ikipe nziza imaze igihe ikina neza, ariko twebwe twari dufite intego yo kwerekana ibyo dushoboye nubwo tutari kwitwara neza buri gihe.”

Ku ruhande rwa Cavaliers, Donovan Mitchell yatsinze amanota 30 naho Evan Mobley atsinda amanota 22 na Rebounds 13. Gusa, iyi ntsinzwi ibujije Cavaliers amahirwe yo kuba ikipe ya mbere yatsinze imikino 18 igatsindwa 1 mu mikino 19 imaze gukina muri shampiyona. Kugeza ubu ifite intsinzi 17 ku ntsinzwi 2.

Mu yindi mikino Houston Rockets batsinze Philadelphia 76ers ku manota 122-115 nyuma yo gukina agace ka gatanu. Alperen Sengun yatsinze amanota 22, rebound 14 na Assist 7. Muri ayo manota, 11 yayatsinze mu gace ka gatanu ka kamarampaka, aho Rockets bashimangiye intsinzi yabo, bakaba bageze ntsinzi 1 n’intsinzwi 6.

I Los Angeles, James Harden yatsinze amanota 43, harimo 23 yo mu gace ka mbere, ubwo Los Angeles Clippers batsindaga Washington Wizards ku manota 121-96. Wizards yongeye gutsindwa umukino wa 13 wikurikiranya.

Miami Heat bo batsinze Charlotte Hornets ku manota 98-94. Tyler Herro yatsinze amanota 27, naho Duncan Robinson atsinda “three-pointers” inshuro esheshatu. Bam Adebayo yakoze Rebound 10 na assist 10. Ku ruhande rwa Charlotte, LaMelo Ball yatsinze amanota 32  na rebound 10.