Shampiyona y’u Rwanda yagarutse: APR FC, Rayon Sports na Kiyovu mu mikino ikakaye

Kuri uyu wa Gatanu ikipe ya Kiyovu Sports, iri mu bihe bigoye, iracakirana na  Etincelles FC kuri Kigali Pele Stadium. Nyuma yo gutsinda umukino umwe mu mikino iheruka gukina muri iyi shampiyona,  irasabwa gukura intsinzi kuri Etincelles kugira ngo irebe ko yahangana no kuzaguma mu Cyiciro cya mbere.

Ikipe ya Etincelles nato nta mpuhwe iraba ifitiye Kiyovu Sports cyane ko igifite umujinya nyuma yo gutsindwa na Rayon Sports igitego 1-0 mu mukino uheruka, irashaka amanota atatu yo gukomeza guhatana no kwirinda ibibazo byo kumanuka nk’uko byayibayeho umwaka ushize.

Mu yindi mikino, APR FC izakira Muhazi United kuri Kigali Pele Stadium, mu mukino igomba gutsinda kugira ngo igarurire icyizere abafana bayo nyuma yo gutangira shampiyona nabi.

APR FC, iri ku mwanya wa 11 n’amanota umunani, irifuza gutsinda uyu mukino mu gihe Muhazi United iri ku mwanya wa 9 n’amanota 10 nayo igamije kwirinda kugwa mu mutego w’ibihe bikomeye nk’ibyayibayeho umwaka ushize, uyu akaba ari umukino uteganyijwe kuri uyu wa Gatandatu.

Ku Cyumweru, Rayon Sports na Gorilla FC zizacakirana mu mukino utegerejwe na benshi. Aya makipe ari ku mwanya wa mbere n’uwa Kabiri, arashaka guhanganira kuyobora shampiyona. 

Rayon Sports, ifite amanota 20, imaze gutsinda imikino itanu yikurikiranya nta gitego yinjijwe. Gorilla FC, ifite amanota 18, irashaka kongera kuyobora shampiyona nibaramuka batsinze uyu mukino.

Imikino y’umunsi wa 10 irasiga bamwe mu bakinnyi b’ibyamamare barebera bagenzi babo  hanze y’ikibuga kubera amakarita y’umutuku n’amakarita atatu y’umuhondo. Abakinnyi batazakina umunsi wa 10 ni aba bakurikira

1.     Lethabo Mathaba (Musanze FC): Amakarita atatu y’umuhondo

2.     Muhindo Collin (Gasogi United): Amakarita atatu y’umuhondo

3.     Muderi Akbar (Gasogi United): Amakarita atatu y’umuhondo

4.     Irakoze Darcy (Gorilla FC): Ikarita y’umutuku

5.     Ndayishimiye Eduard (Amagaju FC): Amakarita atatu y’umuhondo

6.     Sunzu Bonheur (Mukura VS): Ikarita y’umutuku

7.     Nisingizwe Christian (Mukura VS): Amakarita atatu y’umuhondo

8.     Ndikumana Edgard (Vision FC): Amakarita atatu y’umuhondo

Ikipe ya Etincelles FC irasekurana na Kiyovu Sports kuri uyu wa Gatanu

Rurambikana hagati ya Rayon Sports na Gorilla FC kuri iki Cyumweru

APR FC iracakirana na Muhazi United kuri uyu wa Gatandatu