Umutoza wa Rayon Sports U17 yasubijwe ku mpungenge ze z'uko APR FC U17 yakinishije abakinnyi bakuze-VIDEO

Kuri iki Cyumweru itariki 17 Ugushyingo 2024 kuri Kigali Pele Stadium hatangirijwe shampiyona y’abatarengeje imyaka 17 mu byiciro by’abahungu n’abakobwa. Umukino wari utegerejwe na benshi ni uwarangiye Rayon Sports U17 itsinzwe na APR FC U17 ibitego 9-1.

Ubwo umukino wari ukirangira mu kiganiro n’itangazamakuru, umutoza wa Rayon Sports U17 Mbungira Ismail yagaragaje impungege ko ikipe ya APR FC U17 yaba yakoresheje abakinnyi barengeje imyaka yagenwe, bakaba barushije abe imbaraga, akaba ari na yo mpamvu babatsinze ibitego 9-1.

Mbungira Ismail yagize ati: “Ibyabaye mu kibuga mwese mwabibonye. Muri abanyamakuru mujye mutangaza ibyo mwabonye mu kibuga. Ikipe yandushije ariko simbica ku ruhande ko ari bakuru, kubera ko buriya iyo uvuze uko ibintu byitwa biba ari byiza abana bakinnye n’abantu babaruta mwese mwabibonye.

Ikiza ni ugushimira FERWAFA yashyizeho aya marushanwa kugira ngo abana bagaragare, abana batere umupira ni byiza cyane ahubwo ibikosorwa byakagombye gukorwa rugikubuta.

Umutoza wa Rayon Sports U17 Mbungira Ismail yabajijwe ku kuba hari abakinnyi babo nabo bangiwe gukina bikekwa ko nabo barengeje imyaka, akomeza agira ati: “Bo bari abana munsi ya bariya. Hari uburyo babashyize muri sisiteme ntibyakunda. Ni abana bato batari no kubanza mu kibuga mutagira ngo ni abana bari bari ku rwego rwo hejuru tutakinishije.

Abatarengeje imyaka 20 bo kubamenya biroroshye kuko benshi baba bafite indangamuntu, ariko kuri aba batanga ibyangombwa biragoye kugira ngo uzamenye niba umuntu ari mukuru, ni nayo mpamvu mvuga ko umusaruro ushobora kuboneka cyangwa ntuboneke, kuko hakagombye kubaho ingamba zikomeye cyane ku bana bagiye gukina kubera ko umwana w’imyaka 16 yari akiri muto cyane."

Nyuma y’izo mpungenge z’umutoza wa Rayon Sports U17 Mbungira Ismail, Perezida wa FERWAFA Munyantwari Alphonse yavuze ko mbere y’uko aya marushanwa atangira, habayeho gusuzuma ibyangombwa by’aba bakinnyi, hanarebwa amasezerano ababyeyi babo bagiranye n’amakipe bakinira.

Munyantwari Alphonse yagize ati: “Icya mbere tubitekerezaho ni ukubica kubera ko ntabwo ari ko umupira watera imbere, kandi murabizi byaratangiye kuko mu makipe y’abato dufite hari abagiye basezererwa, kandi hari n’abakurikiranweho ibyaha.

Muri iyi shampiyona icyo twakoze twasuzumye muri NIDA [Ikigo cy'Igihugu Gishinzwe Irangamuntu] igihe abana bandikishirijwe n’imyaka bafite. Mu bana bose twanditse twagiye kureba koko ko mu irangamimerere ariyo myaka bafite, amabwiriza y’uyu mwaka ni ko yavugaga. 

Twanze gushyiraho amakipe umutwaro wo kujya gupimisha abana muri MRI kuko bisaba amafaranga menshi, gusa hagize ikibazo gikomera ibyo nabyo twabyitabaza.

   ">