Ishoramari mvamahanga ririyongera umusubirizo! Amahirwe u Rwanda rukura mu guhora ku isonga nk’Igihugu gitekanye

Hashize imyaka 30 u Rwanda rutangiye urugendo rwo kwiyubaka, buri wese ashyize umutima ku cyamufasha kwikura mu bukene no guteza imbere igihugu, ibyatumye umusaruro mbumbe warwo wiyongera n’ibyo umuturage yinjiza bigera ku 1040$.

Ibi bijyana na politike zashyizweho ziteza imbere ishoramari nk’ibyanya by’inganda, guteza imbere ikoranabuhanga no kongera ibikorwa remezo.

Raporo ya Africa Risk-Reward Index 2024 y'Ikigo cy’Abongereza Oxford Economics Africa and Control Risks, ishyira u Rwanda ku isonga mu bihugu byo mu Karere ka Afurika y’Iburasirazuba nk’ahantu hatekanye mu gushora imari n’ubwikorezi bw’ibicuruzwa byambukiranya imipaka bitewe n’ingamba nyinshi zafashwe na Leta.

Iki cyegeranyo cyerekana ko uko imibare izamuka ari nako impungenge z’amahirwe macye yo gushora no gucururiza muri icyo gihugu arushaho kwiyongera.

U Rwanda muri icyo cyegeranyo rufite amanota 5.11 ku 10 akaba ari cyo gihugu kiza ku isonga mu bihugu bigize Umuryango wa Afurika y’i Burasirazuba nk’igihugu gitekanye muri politiki, imibereho rusange n'izamuka ry’ubukungu ku kigero cyiza.

Abashoramari b’abanyamahanga bahisemo u Rwanda, bakunze kumvikana bavuga ko umutekano no korohereza ishoramari n'ibikorwa remezo ari bimwe mu byabakuruye ngo baze gukorera mu Rwanda.

Imibare yashyizwe ahagaragara muri Mata 2024 n’Ikigo cy’Igihugu cy’Ibarurishamibare igaragaza ko ishoramari ryakozwe n’abantu cyangwa ibigo bigura imigabane cyangwa bashora imari yabo mu bigo by’abikorera mu Rwanda, cyangwa batangiza ibigo bishya by’ubucuruzi ryiyongereye mu mwaka wa 2022.

Iri shoramari ryakozwe ahanini ryibanze cyane mu rwego rw’imari rwihariye 33.6% mu gihe urwego rw’inganda rwo rugize 18.6%. Mu rwego rw’ubucuruzi hashowe 14.4% mu gihe urwego rw’ikoranabuhanga rufite ijanisha rya 9%.

Iyo Raporo Ikigo cy’Igihugu cy’Ibarurishamibare yagaragaje ko mu rwego rw’uturere, Umuryango wa COMESA waje ku isonga n’ishoramari rya miliyoni 320.1$, ku mwanya wa kabiri hakaba SADC yakoze ishoramari rya miliyoni 242.5$, OECD ikurikiraho na miliyoni 224.9$.

Ishoramari ryaturutse muri Afurika y’Iburasirazuba ringana na miliyoni 124.1$, muri Asia havuye miliyoni 100.4$ mu gihe imiryango mpuzamahanga n’amabanki byashoye miliyoni 57.6$.

Iyi raporo igaragaza ko ibi bigo mvamahanga byashoye imari mu rwego rw’abikorera mu Rwanda byinjije miliyoni 3,182.9$ mu 2022 avuye kuri miliyoni 2,724.1$ bigaragaza izamuka rya 16.8%. Ibi kandi bingana na 23.9% by’ingengo y’imari y’igihugu yo mu 2022.

Muri werurwe 2024, Ihuriro ry’Abacuruzi b’abanyaburayi (EBCR) ryagaragaje ko ishoramari ryakozwe mu Rwanda mu gihe cy’imyaka itanu ishize, ringana na miliyoni 302 z’amayero ni ukuvuga arenga miliyari 410 Frw.

Imyaka 53 y’ubufatanye hagati y’u Bushinwa n’u Rwanda yakomeje guteza imbere ubukungu bw’impande zombi, aho Minisiteri y’Ubucuruzi n’Inganda, MINICOM igaragaza ko ishoramari ry’abo muri iki gihugu cya kabiri gikize ku Isi, mu rw’imisozi igihumbi ryageze kuri miliyari 1$.

Bimwe mu byashingiweho hakorwa iki cyegeranyo ni intambwe imaze guterwa n’ibihugu 7 mu guteza imbere politike y’ikoranabuhanga ry’ubwenge buhangano (AI) aho u Rwanda ari cyo gihugu cyonyine muri EAC cyemeje iyi politiki.

Ubwo yari mu Rwanda, Umuyobozi Mukuru ushinzwe ubufatanye mpuzamahanga mu muryango w’Ubumwe bw’Uburayi Koen Doens yagaragaje ko icyizere u Rwanda rugirirwa giterwa no kugira ubuyobozi bufite icyerekezo.

Ibi bitangajwe mu gihe Ni mu gihe Raporo ya Banki y’Isi ku birebana n’uburyo ibihugu byorohereza ishoramari yiswe B-Ready 2024 yagaragaje ko u Rwanda ari urwa gatatu ku Isi mu bihugu byoroshya inzira isabwa mu gutangiza ishoramari.

Imibare igaragaza ko ishoramari mvamahanga rigana mu Rwanda ryiyongera kuko nko mu mwaka wa 2022 ryageze kuri miliyoni 658.3$, bigaragaza izamuka rya 21.1% ugereranyije n’umwaka wari wabanje.

Muri Nzeri uyu mwaka, Perezida wa Repubulika Paul Kagame, yagaragaje ko imiyoborere myiza ishyira imbere umutekano, ari impamvu ikomeye yatumye abashoramari baza mu Rwanda.

Ibi Umukuru w’Igihugu yabigarutseho mu kiganiro yagiranye n’Umuyobozi w’Ikigo ‘Milten Institute’, Richard Ditizio, cyabereye muri Singapore ku wa 19 Nzeri 2024, aho Perezida Kagame yitabiriye Inama ya 11 y’Umugabane wa Asia.

Muri icyo kiganiro, Umukuru w’Igihugu yagaragaje ko imiyoborere myiza ishyira imbere umutekano, ifatwa nk’impamvu ikomeye yatumye abashoramari baza mu Rwanda, kuko bataba bikanga ko umutekano wabo n’ibikorwa byabo uzahungabana.

Ati: “Ariko hejuru ya byose hagomba kubaho imiyoborere myiza izana umutekano kugira ngo abantu bakora ishoramari ntibahangayikishwe n’ibindi bintu byinshi.”

Imibare igaragaza ko ubukungu bw’u Rwanda buzazamuka ku mpuzandengo iri hejuru ya 7% kugeza mu 2029.