Abahanzikazi 10 b'Abanya-Uganda bubatse ibigwi ku rwego mpuzamahanga

Kuva kera usanga abahanzikazi mu muziki w’u Rwanda bagenda baba bake ugereranyije n’ab’igitsinagabo. Gusa nta mpamvu yihariye izwi ibitera.

Muri iki gihe hari abahanzikazi bari kugenda binjira mu muziki, ibintu bigaragaza ko mu minsi iri imbere umuziki uzaba umaze kuzamo igitsina gore cyinshi ugereranyije n’uko bimeze uyu munsi.

Bamwe muri abo bahanzikazi bashya bari kuwinjiramo bafite umukoro wo kwerekana ko wakorwa na benshi nk’uko ku bagabo bimeze.

Dore bamwe mu bahanzikazi bo muri Uganda bamaze kubaka ibigwi biri ku rwego mpuzamahanga:

1.     Juliana Kanyomozi

Juliana Kanyomozi uri mu bakomeye muri Uganda, yavutse ku wa 27 Ugushyingo 1980, avukira mu mujyi wa Kampala. Avuka kuri Gerald witabye Imana na Catherine Manyindo. Avuka mu muryango w’abana barindwi, abahungu babiri n’abakobwa batanu, gusa umuhungu umwe yitabye Imana.

Uyu muhanzikazi yakoze album ebyiri gusa z’indirimbo ze ari zo “Nabikowa” na “Kanyimbe”nubwo atangaza ko afite izindi ndirimbo  nyinshi atarakorera album. Mu muziki we aravuga ko yafashijwe n’ababyeyi be haba mu bikorwa ndetse n’ibitekerezo.

Si ibyo gusa kandi kuko Juliana yakoze ibitaramo mu bihugu bitandukanye birimo Kenya, Tanzaniya, u Rwanda, u Burundi, Afurika y’Epfo, Nigeriya, Ibihugu by’Abarabu, u Bwongereza, u BUbirigi, Suwede, u Buholandi, u Bufaransa, Danemarke, Amerika.

Iyo ataba umuhanzi we, ngo yumvaga yaba umunyamategeko. Mu gihe cyo kuruhuka akunda gusoma ibitabo, kureba filime, gutemberana n’inshuti ze ndetse no kumva umuziki cyane.

Amafaranga amutunga ayakura mu buhanzi bwe, ariko kandi yemera ko hari n’abandi bahanzi akunda muri bo harimo Alicia Keys wo muri Leta Zunze Ubumwe za Amerika.

Uyu muhanzikazi kandi yatwaye ibihembo byinshi bijyanye n’umuziki we, ubwo yabazwaga umubare wabyo yatangaje ko bisaga 20.

2.     Sheebah Karungi

Sheebah Karungi w’imyaka 34 y’amavuko, ni umwe bahanzikazi bubatse izina muri Uganda no mu Karere ka Afurika y’Iburasirazuba icyakora urugendo rwe mu muziki yarutangiriye i Kigali aho yahoze ari umubyinnyi mu tubyiniro tunyuranye.

Uyu muhanzikazi uri mu bakunzwe mu Rwanda akaba yitegura no kwibaruka, ni umwe mu bakoranye indirimbo zakunzwe n’abahanzi b’i Kigali barimo The Ben bakoranye ‘Binkolera’ na Embeera Zo yakoranye na Bruce Melodie.

3.     Spice Diana

Namukwaya Hajara Diana wamamaye mu muziki nka Spice Diana wo muri Uganda, ni umuhanzikazi w’imyaka 28 y’amavuko, akaba avuka kuri Beat Nantale.

Uyu mukobwa yatangiye umuziki ari muri Kaminuza ya Makerere, yinjirira mu ndirimbo zirimo "Anti Kale", "Bukete" and "Bimpe". Mu 2014, nibwo yinjiye mu muziki yitwaje indirimbo ye yise ‘Onsanula’ yaje kumuhesha igikombe mu 2015.

Yabanje gukorana na Dr. Fizol washinze Avenue Records wabaye umujyanama we, mu 2016 yakoranye na Label ya ‘Humble Management’ nyuma baratandukana, atangira urugendo rw’umuziki nk’umuhanzi wigenga. Azwi cyane muri iki gihe binyuze mu ndirimbo zirimo "Anti Kale", "I miss you" and "Buteke".

Amaze gukorana indirimbo n’abarimo Pallaso, Ray G, Zuchu, Harmonize, Aganaga, Orisha Sound wo muri Jamaica n’abandu.

4.     Cindy

Umuririmbyi ukomeye muri Uganda, Cindy Sanyu yahoze aririmba mu itsinda ryubatse amateka muri Uganda rya Blue 3, yari arihuriyemo na Jackie Chandiru ndetse na Lilian Mbabazi ukomoka mu Rwanda.

Uyu mugore w’imyaka 38, isaga 20 ayimaze akora umuziki, yagiye avugwa mu rukundo n’abantu batandukanye.

Gusa abazwi cyane bakaba aribo babyaranye barimo Mario Brunetti babyaranye umwana w’umukobwa bise ‘Amani’. Yaje kandi kujya mu rukundo na Joel Okuyo Prynce banakoze ubukwe ku wa 11 Ukuboza 2021, bakaba bombi bafitanye abana.

5.     Azawi

Priscilla Zawedde wamamaye nka Azawi, ari mu muziki kuva mu 2019. Uyu mukobwa asanzwe ari umwanditsi w’indirimbo akaba n’umubyinnyi ukomeye. Kuva muri uriya mwaka, abarizwa mu inzu ifasha abahanzi mu bya muzika ya Swangz Avenue.

Mu 2023, uyu mukobwa w’imyaka 28 y’amavuko yataramiye i Kigali binyuze mu itangwa ry’ibihembo bya ‘Trace Awards’ byabereye muri BK Arena. Ashyize imbere cyane kuririmba indirimbo zubakiye ku mudiho wa Afrobeats, Luganda ndetse n’Icyongereza.

Yabaye umuhanzikazi wa mbere wo muri Uganda wagaragaye ku byapa bya New York ‘Times Square’ ndetse no mu Mujyi wa Los Angeles

6.     Vinka

Umuhanzikazi wo muri Uganda, Nakiyingi Veronica Luggya wamenyekanye nka ’Vinka,’ yabonye izuba ku wa 27 Kamena 1994, akaba afitanye amasezerano na Swangz Avenue na Sony Music Entertainment.

Yasoreje icyiciro cya Kabiri cya Kaminuza muri Makerere mu birebana n’Ubukerarugendo n’Amahoteli, hari mu mwaka wa 2017.

Afite impano zikomatanije aho ari umwanditsi w’indirimbo, umubyinnyi wabigize umwuga akanaba kandi umuririmbyi mwiza.

Mu 2015 ni bwo yinjiye muri Swangz Avenue, akaba afite indirimbo zikunzwe nka Chips na Ketchup, Overdose yakoranye na Voltage Music, Loive Panic n’izindi.

Ku wa 10 Kamena 2021 yibarutse umwana w’umukobwa yabyaranye n’umukunzi we Witta Nelson usanzwe ari umucuruzi n’umunyapolitiki.

Inzu ifasha abahanzi muri Uganda, Swangz Avenue ibarizwamo; Vinka, Azawi, Winnie Nwagi, Elijah Kitaka, Zafarani, na Joy Good. Swangz Avenue imaze imyaka irenga 15 ifasha abahanzi bo muri Uganda, yitegura gufungura amashami muri Kenya na Ghana. Ni Label ifite ishami ritunganya amashusho ryitwa Swangz Films.

7.     Rema Namakula

Umuhanzikazikazi Rema Namakula wahoze ari umugore w’umuhanzi Eddy Kenzo, ari mu bahanzikazi bamaze kugwiza ibigwi mu Karere k’Ibiyaga Bigari.

Rema Namakula yabonye izuba ku wa 24 Mata 1991, avukira mu bitaro bya Lubaga kuri Hamida Nabbosa na Mukiibi Ssemakula (abebyeyi be bose bitabye Imana). Yize amashuri abanza muri Kitante, akomereza ayisumbuye muri Saint Balikudembe, Kaminuza ayisoreza mu yitwa Kyambogo.

Yatangiye kuririmba ubwo yari mu biruhuko by’umwaka wa nyuma w’amashuri yisumbuye, atangira asubiramo indirimbo z’abandi. Bidatinze yatangiye gufasha umuhanzikazi Halima Namakula ku rubyiniro, aza gukomeza aririmbira abandi nka Bebe Cool.

Uyu mugore amaze kwegukana ibihembo binyuranye mu marushanwa atandukanye. Muri HiPipo Awards 2013, yegukanye ibyiciro bine, Best Charts, Best Breakthrough na Best Female Artist na Best R&B Song ‘Oli Wange’.

Rema Namakula ari mu bahanzikazi bakuru aho amaze imyaka isaga 10 atangiye umuziki. Afitanye indirimbo n’abahanzi nka Chike, Ykee Benda, B2C, Bebe Cool n’abandi, kandi zirakunzwe.

8.     Winnie Nwagi

Winnie Nwangi yatangiye umuziki nyuma yo kwitabira irushanwa ryitwa “Coca cola rated next” aho yabaye uwa kabiri ndetse icyo gihe ahita asinya amasezerano muri Swangz Avenue aho yasohoreye indirimbo nka "Embeera", "Katono Katono", "Gwenoonya" na "Kyowulila" ziri mu zatumye amenyekana muri Uganda.

9.     Lydia Jazmine

Umuhanzikazi Lydia Jazmine uri mu bagezweho mu muziki wa Uganda, ari mu bakunzwe by’umwihariko muri Afurika, akaba umwe baherutse kwiyambazwa mu gitaramo cyo kunga itsinda rya Blu 3 ryari rimaze imyaka 16 ryaratandukanye.

10. Karole Kasita

Karole Kasita umuhanzikazi ari mu bamaze kurenga imbibi z’umuziki wa Uganda. Izina rye ryamenyekanye cyane mu Rwanda ku ya 29 Ukwakira 2019, ubwo yashyiraga hanze amashusho y’indirimbo ‘Yaka Remix’ yasubiyemo yifashishije umuhanzi Rukabuza Rickie wamenyekanye mu muziki ku izina rya Dj Pius.

Uyu mugandekazi Karole yavutse tariki 25 Mata 1989, afite impamyabumenyi y’icyiciro cya kabiri cya kaminuza mu bijyanye no kwihangira umurimo (Entrepreneurship) yakuye muri Makerere University Business School.

Yatangiye kuririmba ubwo yigaga mu mashuri yisumbuye muri St Joseph Naggalama, indirimbo ya mbere yakoze yitwaga ‘Bounce it’ yari yakoranye na Nutty Neithan nawe ufite izina muri Uganda.

Uyu muhanzikazi amaze imyaka irenga icumi atangiye gukora muzika nk’uwabigize umwuga. Ubusanzwe Karole yandikiraga indirimbo Ray Signature nawe wubatse izina muri Uganda.

Uretse aba bahanzikazi 10 umuntu yakwita ab'indobanure, ariko hari n’abandi bamaze kubaka amazina ahambaye ku buryo urutonde rushobora kuba rurerure. Urebye no muri Afurika muri rusange, hari abahanzikazi bamaze kubaka ibigwi bikomeye.

Ibi usanga biha umukoro ukomeye abafite aho bahuriye n’iterambere ry’umuziki wo mu Rwanda, aho hari abemeza ko muri za 2016 ku bwa ba Charly na Nina aribwo hari hari abahanzikazi bubatse amazina akamenyekana ku rwego mpuzamahanga, barimo Butera Knowless, Queen Cha, Young Grace, Allioni, Oda Paccy n’abandi.

Bivugwa ko umuziki w’u Rwanda ukennye abahanzikazi bashoboye kuko usanga n’ubonetse atamara kabiri. Mu bahanzikazi igihugu gihanze amaso muri iki gihe, harimo Bwiza, Ariel Ways, Alyn Sano, France Mpundu, Angell Mutoni n’abandi benshi.