Ibyo wamenya ku buzima bwa Anne Mbonimpa uza guhabwa icyubahiro mu mukiro w'u Rwanda na Libya

Ku itariki 9 Ugushyingo 2024, nibwo inkuru mbi yatashye mu Rwanda byumwihariko mu bakunzi b’umupira w’amaguru, yavugaga ko Anne Mbonimpa wari ushinzwe kwita ku iterambere ry’umupira w’amaguru mu bagore muri FERWAFA yitabye Imana.

Urupfu rwa Anne Mbonimpa rwashenguye abanyarwanda benshi, rusiga icyuho gikomeye mu mupira w’abagore kuko yari umugore wihebeye guteza imbere umupira muri iki cyiciro, cyane ko ubuzima bwe kuva mu bwana kugeza ashizemo umwuka bwaranzwe n’umupira w’amaguru utavangiye.

Anne Mbonimpa yavukiye mu muryango w’abana babiri, akaba umwana wa bucura ariko wakundaga gukina umupira w’amaguru. Mu muryango yavukiyemo, yakunze kugorwa n’uko Mama we atiyumvishaga uko yakinaga umupira w’amaguru akawukina n’abahungu.

Ibintu byatumaga akubitwa inshuro nyinshi ubwo yabaga avuye mu kibuga, Mama we amusaba ko yajya akina imikino y’abakobwa.

Ubwo yari arangije amashuiri ye abanza, Anne Mbonimpa yerekeje mu kigo cy’ababikira i Muramba aho yakabirije inzozi ze zo gukina umupira w’amaguru aho yatangiye gukina mu ikipe y’ikigo yigagamo nka rutahizamu.

Bumwe mu buhamya bugaruka ku buzima bwe, buvuga ko Anne Mbonimpa yakuze ari umwana wikundira umupira w’amaguru cyane.

Uwatanze ubuhamya  yagize ati “ Akiri umwana, akiri umunyeshuri yari wa Mwana ufite imbaraga, atambuka nk’abahungu utamenya ko ari umukobwa. Yakundaga umupira w’amaguru cyane ku buryo ibigo yigagamo mu mashuri yisumbuye byamurwaniraga bishaka ko yajya abikinira kuko yari umuhanga mu mupira w’amaguru.

Undi mutangabuhamya  waganiriye na FERWAFA, yagarutse ku buzima bwe ari abanyeshuri ndetse banakinana umupira w’amaguru, cyane ko amuzi neza kuva atangiye amashuri y’isumbuye kugera yitabye Imana.

Ati “ Mu 2001 nibwo yagiye mu mashuri yisumbuye ajya mu kigo cyitwa Itetero de Muramba amarayo imyaka itatu, akunda umupira ndetse akina mu ikipe y’ikigo cyaho. Ari mu wa gatatu w’amashuri yisumbuye, njye nigaga muri FAWE, nibwo twatangiye gukina mu rwego rwashampiyona aho twatangiriye mu ikipe ya Remera yari hano hubatse BK Arena, niho twakiniraga dukinira Umurenge wa Remera witwaga Remera FC.

Nyuma twaje kuyivamo tujya mu ikipe ya Bugesera, tuyikinira igihe gito duhita tujya mu ikipe ya Ruhango, ari naho Anne Mbonimpa yakomereje gukina ruhago kugera mu 2010.

Mu 2010 Anne Mbonimpa twari tukiri kumwe, ahagarika umupira akomeza kwiga ibyo gutoza ruhago ari nako twiganaga muri Kaminuza ya KIE''.

Anne ni izina ryari rizwi cyane mu mupira w’amaguru w’abagore, kuko mbere y’uko aba umutoza, yakiniye amakipe nka Bugesera WFC, Ruhango WFC na Remera WFC. Yakiniye kandi ikipe y’Igihugu y’Abagore. Nk’umutoza, Mbonimpa yazamuye APR WFC ndetse yari afite Licence B-CAF.

Nyakwigendera Anne Mbonimpa yitabye Imana asigaye afite inshingano mu ishirahamwe ryo guteza imbere umupiwa w’amaguru mu bagore.

 Uretse kuba yaraconze ruhago ndetse akanayitoza, Nyakwigendera Anne Mbonimpa yari umugore wubatse kuko yasize umuhungu umwe w’imyaka itandatu, ndetse asiga umugabo bibarukanye uwo mwana bari bamaranye imyaka itandatu kuko bashingiranywe mu 2018, gusa  2016 nibwo bari barashingiranywe imbere y’amategeko.

Mbere y'umukino uhuza u Rwanda na Libya Nyakwigendera Anne Mbonimpa wari ushinzwe kwita ku iterambere ry'umupira w'amaguru mu bagore muri FERWAFA, araza guhabwa icyubahiro