Ikipe ya Etincelles FC yandikiye ishyirahamwe ry'umupira w'amaguru mu Rwanda, FERWAFA irimenyesha ibyo yise akarengane yagiriye ku mukino yatsinzwemo na Rayon Sports aho ivuga ko yatsinze igitego kikangwa kandi cyari cyo.
Ku munsi w'ejo kuwa Gatandatu tariki ya 9 Ugushingo 2024 Saa Kumi n'Ebyiri nibwo ikipe ya Rayon Sports yakiriye Etincelles FC mu mukino w'ikirarane cyo ku munsi wa Karindwi wa shampiyona y'icyiciro cya mbere mu Rwanda.
Uyu mukino warangiye Rayon Sports itsinze igitego 1-0 ariko Etincelles FC ivuga ko itasifuriwe neza aho yavugaga ko umukinnyi wayo Sumaila Moro yatsinze igitego ku munota wa 83 umusifuzi wo ku ruhande akerekana ko habayemo kurarira kandi ataribyo .
Ibi nibyo byatumye iyi kipe Etincelles FC kuri iki Cyumweru tariki ya 10 Ugushingo 2024 yandikira ishyirahamwe ry'umupira w'amaguru mu Rwanda, FERWAFA irimenyesha ko yagiriye akarangene muri uyu mukino bitewe n'uko yangiwe iki gitego kandi cyari cyo.
Iyi kipe yavuze ko nta kurarira kwari kwabayemo kuri Sumaila Moro nk'uko amashusho abigaragaza bityo FERWAFA ikaba ikwiye kugira icyo ikora. Etincelles FC ikoze ibi nyuma ya Vision FC nayo yareze ivugako ku mukino batsinzwemo na APR FC ibitego 2-0 umusifuzi atabasifuriye neza.
Kugeza ubu Etincelles FC iri ku mwanya wa 12 n'amanota 8 ku rutonde rwa shampiyona, ikaba izasubira mu kibuga ikina na Kiyovu Sports tariki ya 26 z'ukwezi.
Eng
RSS 
TANGA IGITECYEREZO