Kuri uyu wa Gatandatu tariki ya 9 Ugushyingo ikipe ya Polisi y’u Rwanda y’umukino wa Handball; Police HC yakinnye imikino ibiri yitwayemo neza bituma ikomeza kuyobora urutonde rwa Shampiyona y'uyu mwaka n’amanota 12/12.
Ni amanota yagize nyuma yo gutsinda ikipe ya Gorilla HC ibitego 67 kuri 27 n’iya Musanze HC ibitego 50 kuri 21, imikino yombi yabereye mu Karere ka Musanze.
Police HC yari yiteguye iyi mikino ku rwego rwo hejuru kuko yari yakoze ku bakinnyi bayo b'ibihangange barimo; Mbesutunguwe Samuel uherutse gufasha ikipe y'Igihugu y’abatarengeje imyaka 20 kwegukana irushanwa nyafurika ryaberaga mu gihugu cya Ethiopia, Rwamanywa viateur, Kayijamahe Yves na Kubwimana Emmanuel bose babashije kwitwara neza.
Umutoza wungirije wa Police HC ushinzwe kongerera ingufu abakinnyi, Inspector of Police (IP) Cyrille Byiringiro, yashimiye abakinnyi bakomeje kwitwara neza muri Shampiyona, bagatsinda imikino 4 yose hamwe bamaze gukina.
Yagize ati: "Abakinnyi barimo kwitwara neza, barakurikiza amabwiriza kandi barimo gutanga umusaruro kuko ubu dufite amanota 12 kuri 12, gahunda dufite ikaba ari ukwegukana iki gikombe cya Shampiyona.”
IP Byiringiro yakomeje ashimira ubuyobozi bwa Polisi y'u Rwanda ku nkunga budahwema gutera ikipe, ashimira n'abafana bakomeje kuyigaragariza urukundo.
Mu mikino yabanje; ku itariki ya 26 Ukwakira, Police HC yari yatsinze UR-Huye ibitego 38 kuri 23, inatsinda Ubuntu HC, ikipe nshya muri Shampiyona y’icyiciro cya mbere, ibitego 39 kuri 13.
Ikipe ya Police HC iyoboye urutonde rwa Shampiyona y'uyu mwaka n’amanota 12/12
Umunyezamu Uwimana Jackson yigaragaje cyane.
Eng
RSS 
TANGA IGITECYEREZO