Premier League: Liverpool yatsikamiye Aston Villa ikomeza gushimangira umwanya wa mbere

Ni mu mukino wakinwe kuri uyu Wa Gatandatu Saa yine z'ijoro kuri Anfield Stadium.Umukino watangiye ikipe ya Liverpool iriyo isatira cyane binyuze ku bakinnyi bayo banyura ku mpande aribo Mohamed Salah na Luis Diaz.

Umukino wakomeje ikipe ya  Aston Villa nayo inyuzamo igasatira imbere binyuze ku bakinnyi bayo bakina imbere barimo Ollie Watkins gusa ba myugariro ba Liverpool bakabyitwaramo neza.

Ku munota wa 20 Liverpool yafunguye amazamu ku gitego cyari gitsinzwe na Darwin Nunez ku mupira yarahawe na Mohamed Salah.

Liverpool yaje gukora impinduka mu kibuga itari yateguye aho Trent Alexander Arnold yagize ikibazo cy'imvune agasimburwa na Conor Bradley.

Ku munota wa 37 ikipe ya Aston Villa yari ibonye igitego cyo kwishyura ku mupira waruvuye muri koroneri yaritewe na Lucas Digne maze Amadou Onana ashyiraho umutwe ariko Caoimhin Kelleher aratabara.

Igice cya mbere cyarangiye ikipe ya Liverpool ikiyoboye n'igitego 1-0. Mu gice cya kabiri ikipe ya Liverpool yaje nabwo ikomeza kurusha Aston Villa mu bijyanye no guherekanya umupira ndetse no kureka uburyo imbere y'izamu.

Ku munota wa 65 amakipe yombi yakoze impinduka aho Liverpool yakuyemo Darwin Nunez na Curtis Jones hajyamo Cody Gakpo na Dominic Szoboszlai mu gihe Aston Villa yo yakuyemo Ollie Watkins na Leon Bailey hajyamo John Duran na Jaden Philogene.

Ku munota wa 80 Liverpool yarase igitego cya 2 ku mupira mwiza waruzamukanywe na Mohamed Salah awuhindura ashaka kuwuha Luis Diaz gusa Ezri Konsa aratabara.

Ku munota wa 86 myugariro wa Aston Villa,Paul Torres yakuweho umupira na Cody Gakpo ari mu rubuga rw'amahina rwa Liverpool awutera imbere maze Ezri Konsa ananirwa kuwukuraho usanga Mohamed Salah aragenda awutereka mu nshundura igitego cya 2 kiba kirabonetse.

Umukino warangiye Aston Villa itsinzwe ibitego 2-0 , Liverpool ikomeza gushimangira umwanya wa mbere n'amanota 28 aho irusha Manchester City iyikurikiye amanota 5.

Indi mikino yabaye muri Premier League ikipe ya Manchester City yongeye gutakaza amanota aho yatsinzwe na Brighton ibitego 2-1, Brentford yatsinze AFC Bournemouth ibitego 3-2, Crystal Palace itsindwa na Fulham 2-0 naho Wolves itsinda Southampton ibitego 2-0.

Mohamed Salah yishimira igitego yatsinze 

Ikipe ya Liverpool yatsinze Aston Villa ibitego 2-0