Andre Onana mu bakinnyi bashaka ko Van Nistelrooy aguma muri Man United

Van Nistelrooy w'imyaka 48, amaze kwigarurira imitima y’abakunzi ba Manchester United n’abakinnyi bayo kuko mu mikino itatu amaze gutoza, ntaratsindwa na rimwe. 

Mu mukino wa Europa League wabaye ku wa Kane, Manchester United yatsinze PAOK ibitego 2-0, ikaba ari intsinzi ya mbere iyi kipe ibonye ku mugabane w'u Burayi mu gihe cy’umwaka urenga.

Uyu mutoza w’agateganyo wagarutse muri United afite intego yo kuyigarurira icyizere, yifuza gukomeza kuba mu ikipe nk'umwe mu bagize itsinda ry'ubuyobozi bushya bwa Manchester United nyuma y’uko inshingano ze nk'umutoza w’agateganyo zirangira ku Cyumweru, mu mukino bazakiramo Leicester City muri Premier League.

Ku rundi ruhande, Andre Onana, umuzamu w’imyaka 28 yagaragaje ko we na bagenzi be bifuza ko Van Nistelrooy akomeza kuba mu ikipe, agira ati: "Ijana ku ijana! Ni umuntu mwiza cyane, umutoza ufite uburambe bwinshi kandi utugira inama zifasha mu kibuga. Biragaragara ko ibyo akora ari byiza kandi abakinnyi turabimushimira."

Onana yakomeje avuga ko nubwo we n'abandi bakinnyi bishimiye Van Nistelrooy, icyemezo cyo kumureka akaguma mu ikipe kiri mu maboko y'ubuyobozi bwa Manchester United. Ati: "Umunsi ku wundi, ni ikipe ifata umwanzuro, twe tuzabikurikiza."

Van Nistelrooy nawe, utashatse kugira icyo atangaza kuri iyi ngingo, yemeje ko icyo yibabanzeho ari ugutegura umukino wa nyuma nk’umutoza w’agateganyo, akemeza ko yifuza gusigira ikipe yatoje intsinzi. 

Yagize ati: "Icyo ntekereza ni umukino wa nyuma mfite nk’umutoza w’agateganyo; ndashaka kuwutegura neza no gufasha abakinnyi kwitwara neza. Ibyo mu minsi iri imbere nzabireka; ubu ntibiri mu bitekerezo byanjye."

Abakinnyi ba Manchester United ntabwo bashaka gutakaza Ruud Van Neistelrooy

Andre Onana mu bakinnyi bashyigikiye ko Van Neistelrooy aguma mu batoza ba Manchester United