Zamushyize hanze y'ikibuga iminsi 914: Neymar n'imvune bambikanye impeta

Ku munsi w'ejo ku wa Mbere tariki 21 Ukwakira 2024, ni bwo ikipe ya Al Hilal yo muri Arabia Saudite yatsindaga ikipe ya Al Ain ibitego 5-4 mu mikino ya Champions Ligue yo ku Mugabane wa Aziya.

Muri uyu mukino Neymar yinjiye mu kibuga asimbuye ku munota 77. Byari nyuma y'uko yari amaze iminsi 368 afite ikibazo cy'imvune yagiriye mu ikipe ye y'igihugu ya Brazil igatuma atongera gukandagira mu kibuga.

Nyuma y'uyu mukino, uyu mukinnyi abinyujije ku mbuga nkoranyambaga ze, yavuze ko ari ibyishimo kongera kwiyumva ari mu kibuga. 

Yagize ati "Ni ibyishimo kongera kwiyumva gutya nanone.Ibinyugunyugu mu nda mbere yumukino bihora ari byiza, menya ari ubuzima kugaruka! Imana iduhe imigisha kandi iturinde."

Neymar yambikanye impeta n'imvune 

Uyu mukinnyi w'imyaka 31 ni umwe mu bari bitezweho kuba ukomeye mu mupira w'amaguru akanatwara ibihembo bitandukanye birimo na Ballon d'Or ariko imvune ni kimwe mu bishobora kuba byaramubujije kubigeraho.

Muri rusange iyo uteranyije iminsi yose yamaze adakandagira mu kibuga kubera imvune, ni iminsi 914. Bwa mbere agira ikibazo cy'imvune hari mu 2014 akina muri FC Barcelona amara hanze y'ikibuga iminsi 32. Yavunitse tariki ya 16 mu kwezi kwa Mbere asubira mu kibuga tariki ya 17 z'ukwezi kwa Kabiri mu 2014.

Neymar yongeye kuvunika ari mu ikipe ya Paris Saint-Germain mu 2018 amara hanze iminsi 90 aho yavunitse tariki ya 26 z'ukwezi kwa Kabiri agasubura mu kibuga tariki ya 27 z'ukwezi kwa Gatanu mu 2018.

Mu 2019 nabwo yongeye kuvunikira mu ikipe ye ya Paris Saint-Germain aho yamaze iminsi 85 adakandagira mu kibuga. Icyo gihe yavunitse tariki ya 29 z'ukwezi kwa Mbere, asubira mu kibuga tariki ya 19 z'ukwezi kwa Kane mu 2019.

Muri uyu mwaka nanone ari mu ikipe y'Igihugu ya Brazil yagize ikibazo cy'imvune cyatumye amara hanze y'ikibuga iminsi 63 aho yavunitse tariki ya 7 z'ukwezi kwa Gatandatu, agasubira mu kibuga tariki ya 9 z'ukwezi kwa Munani.

Bidatinze nyuma yo gukiruka imvune muri uyu mwaka wa 2019 tariki ya 19 z'ukwezi kwa 10 yagize ikibazo cy'imvune mu ikipe ye ya Paris Saint-Germain amara hanze iminsi 37 dore ko yasubiye mu kibuga tariki ya 20 z'ukwezi kwa 11 muri uyu mwaka.

Tariki ya 29 z'ukwezi kwa 11 mu 2021 , Neymar ari mu ikipe ye ya Paris Saint-Germain yagize ikibazo cy'imvune cyatumye amara hanze iminsi 73 dore ko yasubiye mu kibuga tariki ya 10 z'ukwezi kwa Kabiri mu 2022.

Tariki ya 20 z'ukwezi kwa Kabiri mu 2023 nabwo ari muri Paris Saint-Germain yagize ikibazo cy'imvune cyatumye amara hanze y'ikibuga iminsi 130. Yavunitse talriki 20 z'ukwezi kwa Kabiri asubira mu kibuga tariki ya 30 z'ukwezi kwa Gatandatu mu 2023.

Nyuma yo kuva mu ikipe ya Paris Saint-Germain acyerekeza mu ikipe ya Al Hilal yo muri Arabia Saudite mu mwaka ushize, bidatinze yahise agira ikibazo cy'imvune ari mu ikipe ye y'igihugu ya Brazil cyatumye amara hanze y'ikibuga iminsi 368. 

Neymar yavunitse tariki ya 19 z'ukwezi kwa 10 mu mwaka ushize none yasubiye mu kibuga tariki ya 21 z'ukwezi kwa 10  uyu mwaka wa 2024.