Yabaye Minisitiri w'Ububanyi n'Amahanga! Ubuzima bwa Taye Astike Selassie wagizwe Perezida mushya wa Ethiopia

Taye Astike Selassie w'imyaka 68 y'amavuko yarahiriye inshingano ze imbere y'Abadepite kuri uyu wa Mbere tariki 7 Ukwakira 2024 mu muhango wanitabiriwe na Minisitiri w'Intebe, Abiy Ahmed.

Taye Sélassié abaye Perezida wa gatanu kuva mu 1995 Ethiopia ishyizeho Itegeko Nshinga rishya igenderaho kugeza ubu. Riteganya ko Umukuru w’Igihugu ashobora gutorerwa manda ebyiri z’imyaka itandatu (imwe imwe).

Perezida Sélassié yabaye Minisitiri w’Ububanyi n’Amahanga kuva muri Gashyantare umwaka ushize. Mbere yaho, yari Ambasaderi wa Ethiopia mu Muryango w’Abibumbye kuva mu 2018, nyuma yo kuba Ambasaderi w'iki gihugu mu Misiri kuva mu 2017.

Asimbuye ku mwanya w'Umukuru w'Igihugu Madame Sahle-Work Zewde w’imyaka 74 y’amavuko, wari kuri uyu mwanya kuva mu 2018. Nawe yahoze ari umudipolomate w’umwuga. Ethiopia ifite abaturage bagera kuri miliyoni 120.

Gusimburwa kwa Sahle-Work ku butegetsi bisobanuye ko Afurika isigaranye umugore umwe gusa ku mwanya wa Perezida wa Repubulika, Samia Suluhu Hassan wa Tanzania.

Taye Selassie yagizwe Perezida mushya wa Ethiopia asimbura umugore ku butegetsi

Ubwo yahererekanyaga ububasha na Sahle-Work asimbuye

Yamaze kurahirira inshingano nshya