Mukura VS yaguye mu nzara za Rayon Sports mu mukino wa gicuti - AMAFOTO

Rayon Sports yakinnye na Mukura Victory Sports mu mukino wa gicuti wari ugamije kongerera imbaraga abakinnyi bayo no kurushaho kwitegura Shampiyona y'u Rwanda 2024-25 ikiri mu ntangiriro.

Impamvu y'uyu mukino wa gicuti ni uko Shampiyona yabaye isubitswe kubera impamvu z'ikipe y'igihugu Amavubi iri kwitegura gukina na Benin imikino ibiri.

Shampiyona yasubitswe Rayon Sports ari iya kane n'amanota 8, Mukura VS yo ni iya Munani n'amanota 7.

Umukino watangiye Rayon Sports iri gukina neza. Ku munota wa 8 Umunya Mali Adama Bagayogo yacenze ba myugariro ba Mukura nuko bamukorera ikosa ryabyaye kufura itagize icyo imarira Rayon Sports.

Ku munota wa 19 rutahizamu wa Mukura Victory Sports Hende Sunzu Bonheur yafashe umupira ari mu kibuga hagati areba uko umuzamu wa Rayon Sports Khadime Ndiaye yari ahagaze nabi nuko Hende arekura ishoti ryabyaye igitego cya mbere cya Mukura Victory Sports.

Nyuma y'umunota umwe Mukura itsinze igitego, Ishimwe Fiston wa Rayon Sports yazamukanye umupira ba myugariro ba Mukura bamutegera mu rubuga rwamahina nuko umusifuzi yemeza ko nta Penaliti yakozwe.

Ku munota wa 45+2 Rayon Sports yongeye kwisirisimba imbere y'izamu rya Mukura VS nibwo  Ndayishimiye Richard yarekuye ishoti ryabyaye igitego cya Rayon Sports. Igitego cya Ndayishimiye Richard ni nacyo cyasoje igice cya mbere.

Mu gice cya kabiri Amakipe yombi yagarukanye gahunda yo gutsinda igitego cya kabiri cy'intsinzi, gusa byari bigoranye kuko ubwugarizi ku mpande zombi bari bameze neza. 

Rayon Sports yagumye kwatakana imbaraga zidasanzwe nuko ku munota wa 86 Adama yazamuye umupira Fall Ngagne aterekaho umutwe abonera Rayon Sports igitego cya kabiri. 

Igitego cya Fall Ngagne cyabonetse ku munota wa 86 ni nacyo cyasoje umukino warangiye abakunzi ba Rayon Sports bishyimye, aba Mukura bamanuka I Butare bababaye. 

Abakinnyi babanje mu kibuga ku ruhande rwa Mukura VS 

Abakinnyi babanje mu kibuga ku ruhande rwa Rayon Sports 

Abakinnyi ba Rayon Sports bishimiraga igitego cya mbere 

AMFOTO: Ngabo Serge Inyarwanda