Umugaba Mukuru w’Ingabo z’u Rwanda, akaba n’Umuyobozi w’Icyubahiro w’Ikipe ya APR FC, General Mubarakh Muganga yasabye abakinnyi b’iyi kipe gusezerera FC Pyramids yo mu Misiri bakinjira mu matsinda ya CAF Champions League bahigirura Inkotanyi.
Iyi kipe y’Ingabo z’Igihugu iri kubarizwa mu Misiri aho yagiye gukina umukino wo kwishyura w’ijonjora rya kabiri ya CAF Champions League 2024/25.
Umukino ubanza wari wabereye muri Stade Amahoro warangiye amakipe yombi anganya igitego 1-1. Ubwo bivuze ko kugira ngo APR FC ikomeze isabwa nibura kwinjiza igitego kugira ngo ibe yakomeza. Ishobora gutsinda 1-0, 2-0, 2-1… cyangwa no kunganya ibitego biri hejuru ya 2 kubera ko CAF igiha agaciro igitego cyatsindiwe hanze.
Kuri uyu wa Gatanu tariki 20 Nzeri 2024, abicishije ku rubuga rwa X, Umuyobozi w’Icyubahiro w’iyi kipe, Gen. Mubarakh Muganga yasabye abakinnyi ba APR FC kwihagararaho bagakora amateka yo kuba ikipe ya mbere igeze mu matsinda ya CAF Champions League.
Yagize ati “Bakinnyi ba APR F.C, mwatweretse ko muri Intare kandi mushoboye. Inama n’intego ni ya yindi. Mwarahize natwe biba uko, nimuze duhigure Abakunzi b’Inkotanyi barategereje. APR F.C, intsinzi Iteka.”
Uyu mukino wo kwishyura uteganyijwe ku wa Gatandatu, tariki ya 21 Nzeri 2024 mu murwa mukuru Cairo wa Misiri, aho ikipe izatsinda uyu mukino w’ijonjora rya Kabiri azahita yinjira mu matsinda ya CAF Champions League ya 2024/2025.
Gen. Mubarakh Muganga yasabye APR FC guhigurira Inkotanyi isezerera Pyramids FC
Eng
RSS 
TANGA IGITECYEREZO