Mikel Arteta yemeye kuguma muri Arsenal kugeza muri 2027

Ni amakuru yagiye hanze mu gitondo cyo kuri uyu wa Kane taliki 12 Nzeri 2024, akaba yashyizwe hanze n’ibinyamakuru byo ku mugabane w’i Burayi birimo The Athlethic. Mikel Arteta yari afite amasezerano azarangirana n’uyu mwaka wa 2024, gusa kuri ubu we na Arsenal bamaze kumvikana ko yakongeraho imyaka 3.

Ibi bije mbere y'uko iyi kipe y’Abarashi mu mpera z’iki Cyumweru ifite umukino ukomeye muri shampiyona y’Icyiciro cya mbere mu Bwongereza izakinamo na Tottenham basangiye umujyi wa London.

Arteta yasubiye muri Arsenal nk’umutoza muri 2019 asimbuye Unai Emery nyuma y'uko yari yarayibayemo nk’umukinnyi kuva muri 2011 kugeza muri 2016. 

Kuva icyo gihe yayifashije gutwara igikombe cya FA Cup cyo muri 2020 anayifasha gusubira mu mikino ya UEFA Champions League muri 2023 nyuma y’imyaka 7 itayikina.

Uyu mutoza w’imyaka 42 kandi yayifashije gusoreza ku mwanya wa 2 muri shampiyona inshuro 2, mu mwaka ushize w’imikino ndetse n'uwari wabanje wa 2022-23.  

Kuri ubu Mikel Arteta yitezweho gufasha Arsenal kwegukana igikombe cya shampiyona nyuma y'uko asinyishije abakinnyi bashya barimo Mikel Merino, Rahim Sterling na Riccardo Calafiori.

Nyuma y’imikino 3 ya shampiyona imaze gukinwa, Arsenal iri ku mwanya wa 4 n’amanota 7 aho yatsinze Wolves 2-0, igatsinda Aston Villa 2-0 ikanganya an Brighton 1-1.

Mikel Arteta yemeye kongera amasezerano azamugeza muri 2027 ari umutoza mukuru wa Arsenal