Mitima Isaac yavuze uko yakiriwe, anerekana itandukaniro rya shampiyona yagiyemo n'iyo mu Rwanda

Mu kwezi kwashize kwa 8 nibwo uyu mukinnyi wakiniraga Rayon Sports yerekeje muri iyi ikipe ya Al-Zulfi ikina muri shampiyona y'icyiciro cya mbere muri Arabia Saudite.

Nyuma y'igihe gito Mitima Isaac atangiye urugendo rushya rwo gukina muri iki gihugu, yaganiriye na InyaRwanda avuga ko yagezeho agasanga ikipe yerekejemo ari nziza ndetse akaba yaranakiriwe neza.

Ati" Ikipe ya Al-Zulfi nasanze ari ikipe nziza cyane iri muri shampiyona nziza ,kurushanwa kuba kuri hejuru kuko abantu benshi bibeshya kuri iyi shampiyona njyewe nkina muri shampiyona ikurikira iya ba Cristiano Ronaldo. Muri iyi kipe banyakiriye neza nisanze mu bandi cyane cyane ko nasanzemo abandi ba Nyafurika nka 2 aho umwe ari Umunya-Cameroon n'undi w'Umunya-Ghana."

Yakomeje avuga ko ari shampiyona ikomeye kuko amakipe yaho afite amafaranga bityo ko izamuzamurira urwego.

Ati" Ni shampiyona ikomeye kuko amakipe ya hano afite amafaranga, agura buri abakinnyi bose ashatse bafite ubushobozi bwa kabiri ku bajya mu cyiciro cya ba Cristiano. 

Nk'ikipe turi gutinya twumva ko twahangana ikinamo uwahoze ari kapiteni wa Karim Benzema ikanakinamo kapiteni w'ikipe y'igihugu ya Misiri. Urumva ko nyine shampiyona yacu irakomeye irimo abakinnyi b'amazina manini kandi baracyazana n'abandi. 

Rero navuga ko ari shampiyona imeze neza izampa uburyo bwo kwisumbura mu mikinire no kugira uburambe".

Mitima Isaac yavuze ko shampiyona yaho akina ikora kinyamwuga bityo ko atapfa kuyigereranya n'iyo mu Rwanda.

Ati" Uburyo nabigereranya shampiyona ya hano niyo mu Rwanda navuga ko hano bakora kinyamwuga kurusho mu yo mu Rwanda ariko umupira usa nkaho wabaye umwe kuko ni ukwiga ariko nyine hari ukuntu badusize ibintu biba biri ku murongo.

Hano umukinnyi aba afite aho aba he ikipe yagennye, imodoka n'ibindi ku buryo bigushyira mu buryo bwiza bwo gutanga ibintu byose ufite mu bushobozi bwawe. Rero urumva ntabwo napfa kubigereranya no mu Rwanda bitewe n'ubushobozi biratandukanye kandi n'ubushobozi bw'abakinnyi hano haza abisumhuyeho".

Yavuze ko bishoboka cyane ko ikipe ye ishobora no kuzazamuka mu cyiciro gjkinamo ba Cristiano Ronaldo dore ko amakipe asoje mu myanya 6 ya mbere aba afite amahirwe yo kujyimo aho 2 ya mbere ahita ajyayo naho ndi agakina imikino ya kamarampaka.

Uyu myugariro kuva yagera muri Al-Zulfi amaze kuhakina imikino 3 abo umwe yinjiyemo asimbuye naho indi 2 abanzamo. Muri iyi mikino 3 iyi kipe ifite amanota ane aho yatsinze umwe,itsindwa umwe, inganya  uwa  Gatatu.