Ahabanza Imikino

APR FC na Police FC zigiye guhabwa Miliyoni 68 z'Amanyarwanda

Yanditswe na: Aloys Niyonyungu
Taliki:16/08/2024 18:03 0

Ikipe ya APR FC na Police FC zihagarariye u Rwanda mu mikino Nyafurika, zigiye guhabwa Miliyoni 68 z'Amanyarwanda n'impuzamashyirahamwe y'umupira w'amaguru ku mugabane w'Afurika, CAF.

Ikipe ya APR FC yegukanye igikombe cya shampiyona y'icyiciro cya mbere mu Rwanda mu mwaka ushize w'imikino ni yo yaserukiye u Rwanda mu mikino ya CAF Champions League aho izacakirana na Azam FC yo muri Tanzania mu ijonjora ry'ibanze.

Ni mu gihe Police FC yo ihagarariye u Rwanda mu mikino ya CAF Confederation Cup nyuma y'uko yegukanye igikombe cy'Amahoro itsinze Bugesera FC ku mukino wa nyuma ikaba izatangira ikina na Constantine yo muri Algeria mu ijonjora ry'ibanze.

Kuri ubu Impuzamashyirahamwe y'umupira w'amaguru ku mugabane w'Afurika yafashe umwanzuro ko amakipe yose azakina ijonjora ry'ibanze rya CAF Champions League na CAF Confederation Cup azahabwa miliyoni 68 z'Amanyarwanda.

Impamvu CAF yabikoze ni ukugira ngo hazamurwe urwego rw'irushanwa ndetse amakipe anahabwe ubufasha mu bijyanye n'amafaranga. Ubusanzwe amakipe yahabwaga amafaranga ni ayabaga yageze mu matsinda kugeza ku ikipe itwaye igikombe.

Ikipe yageze mu itsinda rya CAF Champions League ikaba iya Kane ihabwa arenga Miliyoni 700 z'Amanyarwanda mu gihe iyabaye iya kane mu itsinda rya CAF Confederation Cup yo ihabwa arenga Miliyoni 400 z'Amanyarwanda.