Myugariro w'Umunyarwanda, Rwatubyaye Abdul waherukaga gutandukana n'ikipe ya FC Shkupi ikina shampiyona y'icyikiro cya mbere muri Macedonia, yabonye ikipe nshya yitwa Brera Strumica FC nayo yo muri iki gihugu.
Kuri uyu wa Gatatu taliki ya 11 Nzeri 2024 ni bwo uyu mukinnyi ndetse n'iyi kipe babinyujije ku mbuga nkoranyambaga batangaje aya makuru. Rwatubyaye Abdul yasinye amasezerano y'umwaka umwe muri iyi kipe nyuma y'uko taliki ya 1 y'uku kwezi ari bwo yatandukanye na FC Shkupi yari yaragezemo mu kwezi kwa Mbere muri uyu mwaka avuye muri Rayon Sports.
Ikipe ya Brera Strumica FC uyu mukinnyi yerekejemo, yashinzwe 2010 ihera muri shampiyona y'icyiciro cya kabiri muri Macedonia, maze muri 2017 izamuka mu cyiciro cya mbere. Muri 2018 yahise inegukana igikombe cy'igihugu itsinze Makedonija G.P penariti 6-4.
Iyi kipe imaze kwitabira amarushanwa yo ku mugabane w'Iburayi aho muri 2019 yitabiriye Europa League naho muri muri 2022 ikitabira UEFA Conference League. Mu mwaka ushize muri shampiyona yasoreje ku mwanya wa 7.
Usibye kuba Rwatubyaye yarakiniye FC Shkupi ahubwo yanyuze no mu yandi makipe atandukanye arimo: Isonga FC APR FC, Rayon Sports, Kansas City, Swope Park Rangers, Colorado Rapids na Colorado Switchbacks muri Leta Zunze Ubumwe za Amerika.
Eng
RSS 
TANGA IGITECYEREZO