Abanyamuryango ba Kiyovu Sports batoye komite iriho babitekerejeho?

Kiyovu Sports ikomeje kuba mu bihe bisharira ndetse buri wese uba hafi y'iyi kipe ntiyabasha kubisobanura. Ni agahinda kagiye kwinjira mu mwaka wa kabiri nyuma y'imyaka ibiri y'ibyishimo iyi kipe yamaze irwanira igikombe cya shampiyona, ariko aho bukera irarwana no kutamanuka mu cyiciro cya kabiri cyangwa se yoherezweho ku ngufu.

Tariki 26 Gicurasi 2024 ni bwo Abanyamuryango ba Kiyovu Sports mu nteko rusange batoye komite nshya ya Kiyovu Sports, iyobowe na Nkurunziza David nka Perezida wayo, Mbarushimana Ally nka Visi Perezida wa mbere na Karangwa Joseph nka Visi Perezida wa kabiri.

Abanyamuryango batoye iyi komite bashaka ngo gusubirana Kiyovu Sports itagira amakimbirane, ubugambanyi ndetse ikaba Kiyovu Sports itwara ibikombe yitabira kuko aba mbere byari byarabaniniye.

Mu mezi abiri gusa iyi komite imaze iyoboye Kiyovu Sports, ibimenyetso biragaragaza ko abayobozi bahawe iyi kipe bashobora kuba batari amahitamo y'ukuri bigendanye n'ibibazo iyi kipe yari ifite cyangwa bakaba bari amahitamo y'ukuri ariko bakaza gutenguhwa.

Nkurunziza David ntabwo akozwa ibyo kurekura amafaranga kuko ikipe atari iye wenyine, ariko nk'umuyobozi ntanerekana umurongo uzazana amafaranga mu ikipe 

Iyi komite ya Kiyovu Sports yagiyeho ibizi neza ko igiye mu ikipe ifite amadeni yaba ay'ako kanya ndetse n'amadeni y'imyaka yatambutse. Nibura kujya mu ikipe babizi ko ifite amadeni byari byiza kuko bari bafite amakuru nabo bagomba gukoresha basubiza ikipe ku murongo ariko ntabwo babikoze.

Ese komite ya Kiyovu Sports yatowe yari yabanje kwigwaho neza?

Bijya gutangira, byatangiye Nkurunziza David yiyegereza Kiyovu Sports cyane ndetse bamwe mu banyamuryango batangira kumubona nk'umuntu ufite ubushobozi bwo kubabera igisubizo ariho bahereye babirindura Juvenal Mvukiyehe.

Kiyovu Sports irimo amafaranga yashatse no kugarura Ndikumana Codjifa ngo bamusinyishe bajye bamwishyura gacye, arabyanga avuga ko ashaka amafaranga ye ubundi akazajya gukina ahandi 

Ubwo Mvukiyehe Juvenal yayoboraga Kiyovu Sports, Nkurunziza David ubu uyobora Kiyovu Sports ni umwe mu bantu batangaga inkunga mu ikipe kandi ubona abyishimiye. Nyuma yaho Juvenal abirinduriwe, David yakomeje gutanga inkunga mu buryo bumwe cyangwa ubundi.

Intandaro yo kwemeza Nkurunziza David ko yaba Perezida wa Kiyovu Sports

Ubwo Kiyovu Sports yageraga mu bihe bibi mu mpera za shampiyona y'umwaka ushize, Nkurunziza David yafashije iyi kipe akajya yitanga nk'ibihumbi 200 Frw, ibihumbi 100 Frw. Abari bayoboye Kiyovu Sports batangiye kubona ko uyu David ashobora kuba afite amafaranga yafasha ikipe, bituma bo na David bumvikana ko yazayiyobora.

David amaze kuba Perezida wa Kiyovu Sports yihindutse abantu

Navuga ko ari ukwihinduka abantu cyangwa kwiyerekana uko uri bitandukanye n'uko abantu bagukekaga. Nkurunziza David nyuma yo gufata ikipe, abanyamuryango batangiye kujya bamubaza amafaranga ndetse no kubaha gahunda yo gukemura ibibazo ikipe ifite, ariko akababwira ko amafaranga afite atari ayo gutunga ikipe ahubwo ko bazana amafaranga nawe akazana andi bakubaka ikipe.

Umutoza Petros yabwiye Kiyovu Sports ko nta kindi bavugana usibye kumuha amafaranga ye 

Urugero rwa hafi ni nk'aho ejobundi hashize David abinyujije muri WhatsApp group yabwiye nabi abanyamuryango ba Kiyovu Sports ababwira ko batakomeza kumuzengereza bamwaka amafaranga nk'aho ikipe ari iye gusa.

Nkurunziza David mu buryo bwo gukemura ibibazo, hari aho yandikiye abo irimo amadeni ngo bayorohereze

Tariki 11 Nyakanga 2024 Kiyovu Sports yandikiye abahagarariye abakinnyi barimo John Mano na Ndikumana Codjifa babasaba ko bareka FIFA ikabakuriraho ibihano gusa nabo bakabereka uko bazabishyura.   

Kiyovu Sports yavugaga ko aba bakinnyi izabishyura mu byiciro 2 aho icyiciro cya mbere bari kuzishyurwa tariki 30 Nzeri 2024, ubundi icyiciro cya kabiri bakishyurwa tariki 30 Ukuboza 2024. Abahagarariye abo bakinnyi barabyanze bavuga ko igihe cyo kuyatanga amafaranga cyazagera shampiyona yaratangiye kandi babishatse babambura.

Nta gikozwe Kiyovu Sports ishobora kutazandikisha umukinnyi n'umwe

Komite ya Kiyovu Sports ubu yicaye itegereje amafaranga y'umujyi wa Kigali kandi aya mafaranga ntazwi igihe azazira, n'iyo yaza ashobora gusanga kwandikisha abakinnyi muri FIFA byararangiye.

Impamvu yo gusaba bamwe mu bo barimo amafaranga ngo baborohereze byari ukugira ngo iyi kipe izakoreshe amafaranga make mu kwishyura bamwe barimo Emmanuel Kalyowa uheruka kwishyuza, n'umutoza Petros bashatse ko aborohereza ariko arabangira.

Igihari ni uko n'iyo Kiyovu Sports yava mu bibazo irimo by'amadeni tutitaye ku buryo yabivamo, komite y'iyi kipe ifite uburyo iri gusigana ku mafaranga bizateza ibihe bibi muri iyi kipe bitigeze bibaho.

John Mano na n'ubu ntabwo arishyurwa na Kiyovu Sports